“Philips” şirkətinin "Future Health Index 2026" hesabatına görə, süni intellekt səhiyyə işçilərinin iş prosesində əhəmiyyətli dəyişikliklər yaradaraq onların vaxtına qənaət edir, stress səviyyəsini azaldır və xəstələrlə daha çox ünsiyyət qurmasına imkan yaradır.

Aztibb.az "Medikforum"a istinadən yazır ki,aAraşdırma Braziliya, Çin, Fransa, Almaniya, Hindistan, İndoneziya, Niderland, Səudiyyə Ərəbistanı, Böyük Britaniya və ABŞ-da çalışan 2 mindən çox tibb işçisi və 20 mindən artıq pasiyentin iştirakı ilə aparılıb.

Hesabata əsasən, səhiyyə mütəxəssislərinin 80 faizindən çoxu süni intellektin xəstə müalicəsinin nəticələrini yaxşılaşdıracağına inanır. Respondentlərin 70 faizi isə bu texnologiyanın faydalarının risklərdən daha üstün olduğunu düşünür.

Məlumata görə, süni intellektdən istifadə edən klinisyenlərin təxminən yarısı ildə azı 132 saat vaxt qazandığını bildirib. Bu isə üç tam iş həftəsindən artıq müddətə bərabərdir. Xüsusilə tibb bacıları inzibati və qeyri-klinik işlərdə daha çox vaxt qənaəti əldə etdiklərini qeyd ediblər.

Tibb işçilərinin 71 faizi süni intellekt sayəsində iş proseslərinin daha səmərəli təşkil olunduğunu, 50 faizi isə daha çox xəstəyə xidmət göstərə bildiklərini vurğulayıb. Respondentlərin təxminən yarısı bu texnologiyanın iş-həyat balansını yaxşılaşdırdığını və stress səviyyəsini azaltdığını bildirib.

Süni intellekt əsasən tibbi qeydlərin hazırlanması, görüşlərin planlaşdırılması və sənədləşmə işlərində istifadə olunur. Bununla yanaşı, həkimlər texnologiyadan rentgen görüntülərinin daha sürətli təhlili, dərman qarşılıqlı təsirlərinin müəyyənləşdirilməsi və klinik qərarların dəstəklənməsi üçün də yararlanırlar.

Araşdırma iştirakçılarının 39 faizi son üç ay ərzində süni intellektin ən azı üç dəfə potensial tibbi səhvləri aşkar etdiyinin və ya qarşısını aldığının şahidi olduğunu bildirib. Tibb işçilərinin 65 faizindən çoxu isə bu texnologiyanın qərarvermə prosesində özünəinamlarını artırdığını qeyd edib.

Bununla yanaşı, hesabatda vurğulanır ki, süni intellektə maraq səhiyyə müəssisələrinin onu tətbiq etmə sürətini üstələyir. Tibb işçilərinin təxminən üçdə ikisi iş yerlərində kifayət qədər imkan olmadıqda şəxsi süni intellekt alətlərindən istifadə etdiyini etiraf edib.

Mütəxəssislər hesab edirlər ki, gələcəkdə süni intellekt səhiyyə peşələrinin fəaliyyət formasını əhəmiyyətli dərəcədə dəyişəcək. Respondentlərin 96 faizi iş üsullarının dəyişəcəyini, 53 faizi isə peşələrində ciddi transformasiya baş verəcəyini gözləyir.

Bununla belə, tibb işçilərinin əksəriyyəti insan amilinin əvəzolunmaz olduğunu vurğulayır. Sorğuda iştirak edənlərin 86 faizi süni intellektin verdiyi nəticələrin mütləq insan nəzarətindən keçməli olduğunu, 80 faizdən çoxu isə bu texnologiyanın heç vaxt həkimlə pasiyent arasındakı münasibətləri əvəz edə bilməyəcəyini bildirib.