Rusiyada qlioblastoma xəstəliyinə qarşı hazırlanmış ilk onkovaksinlərin 2026-cı ildə tətbiqinə icazə alınması gözlənilir. Bu barədə iyunun 9-da Rusiya Federal Tibbi-Bioloji Agentliyinin rəhbəri Veronika Skvortsova məlumat verib.

Aztibb.az "İzvestiya" nəşrinə istinadən yazır ki, Agentlik rəhbərinin sözlərinə görə, 2026-cı ildə qlioblastomaya qarşı onkovaksinin istifadəsinə icazə verilməsi nəzərdə tutulub.

Skvortsova bildirib ki, ilk vaksin peptid əsaslı olacaq və “Qliopept” adlanacaq. Agentlik ilin sonuna qədər qlioblastomaya qarşı hazırlanmış mRNT texnologiyalı ikinci vaksin — “Qliorna” üçün də istifadəyə icazə almağı planlaşdırır.

Qlioblastoma beynin ən aqressiv bədxassəli şişlərindən biri hesab olunur və çox vaxt təsadüfən aşkar edilir. Tibb elmləri namizədi, onkoloq Yevgeni Çeremuşkin aprelin 14-də xəstəliyin gözlənilməz əlamətlərindən danışarkən qeyd edib ki, qlioblastomadan şübhələnməyə səbəb ola biləcək əlamətlər arasında görmə, eşitmə və qoxubilmə qabiliyyətinin qəfil pisləşməsi, davamlı baş ağrıları və koordinasiya pozğunluqları yer alır.

Mütəxəssislər vurğulayırlar ki, yeni vaksinlərin effektivliyi və təhlükəsizliyi ilə bağlı yekun nəticələr yalnız bütün klinik sınaqlar tamamlandıqdan və müvafiq tənzimləyici qurumların təsdiqindən sonra məlum olacaq.