Azərbaycan Tibb Universitetinin (ATU) Stomatologiya fakültəsinin rəhbərliyi I kursa qəbul olan tələbələrlə onlayn görüş keçirib.

 

Görüşdə fakültə dekanı dosent Səid Əhmədov iştirakçıları Azərbaycan xalqının böyük zəfəri münasibəti ilə təbrik edərək bildirib ki, Ali Baş Komandan, Prezident İlham Əliyevin rəhbərliyi ilə Azərbaycan ordusu 44 gün davam edən hərbi əməliyyatlar çərçivəsində mənfur düşmənin zəbt etdiyi torpaqlarımızı geri qaytardı: "Qələbə sevincini bizə bəxş edən Ali Baş Komandana, şanlı Ordumuza sonsuz təşəkkür edir, Vətən uğrunda şəhid olmuş bütün qardaşlarıma Allahdan rəhmət, ailələrinə səbir diləyirik”.

 

Dekan S. Əhmədov koronavirus pandemiyası səbəbindən hazırda ölkədə və dünyada hökm sürən gərgin vəziyyətlə əlaqədar təhsilin distant formada aparıldığını xatırlatdı: “Universitet müəllimləri onlayn dəsrlərdə iştirak edirlər. Bununla yanaşı, çox geniş beynəlxalq əlaqələrə malik olan ATU-nun bəzi xarici ölkələrin universitetiləri ilə qarşılıqlı əməkdaşlıq memorandumu var. Hazırda tələbələrimiz Türkiyənin Ankara və Qazi Universitetlərinin təşkil etdiyi distant təhsilə qoşularaq, onların tələbələri ilə eyni dərsləri izləmək imkanı əldə edir”.

 

Daha sonra fakültənin akademik məsləhətçisi Aysel Həşimova tələbələri maraqlandıran sualları cavablandırıb.