“Virtual pasiyent” platforması gələcək pediatrların hazırlığında süni intellekt texnologiyalarından istifadəni genişləndirir. Platforma real xəstəlik tarixçələri əsasında klinik halları modelləşdirir və tələbələrə təhlükəsiz rəqəmsal mühitdə tibbi müayinə aparmaq imkanı yaradır.

Aztibb.az “Uçitelskaya qazeta”ya istinadən yazır ki, N.F.Filatov adına Uşaq Sağlamlığı Klinik İnstitutunda yaradılan sistemə uşaqlıq xəstəlikləri üzrə interaktiv dərsliklər, 1500-dən çox audio-video material, minlərlə sağlamlıq göstəricisi və 176 virtual pasiyent daxil edilib. Platforma tələbələrin klinik düşüncə qabiliyyətini inkişaf etdirmək üçün real tibbi situasiyalar təqdim edir.

Sistemə inteqrasiya olunan süni intellekt tələbələrin bilik səviyyəsini qiymətləndirir, zəif olduqları mövzuları müəyyən edir və əlavə tədris materialları təklif edir. Yeni istifadəyə verilən “Həkim-pasiyent” modulu isə tələbələrə virtual pasiyentlə dialoq quraraq anamnez toplamağı öyrədir. Süni intellekt tələbənin verdiyi sualların düzgünlüyünü analiz edir və onun kommunikasiya bacarıqlarını inkişaf etdirməyə kömək edir.

İnstitutun direktoru Yekaterina Alekseyeva bildirib ki, platforma real pasiyentlə işləməni əvəz etməsə də, tələbələrin praktiki bacarıqlarını əvvəlcədən təkmilləşdirməsinə imkan yaradır.

Bu il platformaya əlavə olunacaq “Sİ-naviqator” modulu tələbələrin psixoloji xüsusiyyətlərini, öyrənmə sürətini və maraqlarını təhlil edərək onlara uyğun ixtisas seçimi və fərdi təhsil istiqaməti barədə tövsiyələr verəcək.

Hazırda platformada Rusiyanın 13 tibb universitetindən 5 minə yaxın tələbə qeydiyyatdan keçib. Layihənin tətbiqindən sonra uşaqlıq xəstəliklərinin propedevtikası imtahanında “əla” qiymət alan tələbələrin sayı 28 faiz artıb.