Rusiya Elmlər Akademiyasının Sibir Bölməsinin Kataliz İnstitutu və Novosibirsk Dövlət Universiteti alimləri plastik tullantıların motor yanacağına çevrilməsi üçün yeni katalizator hazırlayıblar.

Aztibb.az "Ecopravda" nəşrinə istinadən yazır ki, mütəxəssislərin fikrincə, bu texnologiya təkcə ekoloji deyil, həm də insan sağlamlığı baxımından mühüm əhəmiyyət daşıya bilər.

Araşdırma zamanı alimlər polietilen və polipropilen tullantılarını yüksək temperaturda emal edərək xüsusi piroliz yağı əldə ediblər. Sonrakı mərhələdə isə yeni bifunksional katalizator vasitəsilə həmin maddə daha təhlükəsiz və istifadəyə yararlı motor yanacağına çevrilib. Yeni üsulun üstünlüklərindən biri də katalizatorda bahalı platin elementindən istifadə olunmamasıdır ki, bu da texnologiyanın daha əlçatan olmasına imkan yaradır.

Mütəxəssislər bildirirlər ki, plastik tullantıların ətraf mühitdə uzun müddət qalması hava, su və torpaq çirklənməsinə səbəb olur. Xüsusilə plastiklərin yandırılması zamanı ayrılan zəhərli maddələr tənəffüs sistemi xəstəlikləri, allergiyalar, hormonal pozğunluqlar və bəzi onkoloji risklərlə əlaqələndirilir. Bu baxımdan tullantıların təhlükəsiz şəkildə emalı ictimai sağlamlıq üçün mühüm addım hesab olunur.

Alimlərin sözlərinə görə, yeni texnologiya plastik tullantıların həcmini azaltmaqla yanaşı, ətraf mühitə yayılan toksik maddələrin də qarşısını ala bilər. Bu isə xüsusilə sənaye bölgələrində yaşayan insanların sağlamlığının qorunmasına müsbət təsir göstərə bilər.

Araşdırma müəllifləri hesab edirlər ki, gələcəkdə belə texnologiyaların geniş tətbiqi həm alternativ enerji mənbələrinin inkişafına, həm də ekoloji risklərin və bununla bağlı xəstəliklərin azalmasına töhfə verə bilər.