Bioloji nümunələr “Tyançjou-10” missiyası çərçivəsində Çin orbital stansiyasına göndərilib və hazırda eksperimental modulda saxlanılır. Alimlərin məlumatına görə, təcrübə uğurla davam edir.

Aztibb.az “Xinhua” agentliyinin məlumatına istinadən yazır ki, tədqiqatın məqsədi mikroqravitasiyanın insan embrionlarının erkən inkişaf mərhələlərinə təsirini öyrənməkdir. Mütəxəssislərin fikrincə, bu eksperiment insanın kosmosda uzunmüddətli yaşaması və çoxalması ilə bağlı mühüm suallara cavab tapmağa kömək edə bilər.

Layihənin rəhbəri Yu Leçyan bildirib ki, orbitdə yerləşən nümunələrin inkişafını Yer üzündə müşahidə olunan analoji strukturlarla müqayisə etməklə embrionların ilkin inkişaf mərhələlərinə təsir edən amilləri müəyyənləşdirmək və insanın kosmosda uzun müddət qalması ilə bağlı problemləri araşdırmaq mümkün olacaq.

O vurğulayıb ki, süni embrionlar tam formalaşmış insan orqanizminə çevrilmək qabiliyyətinə malik deyil və yalnız elmi tədqiqat məqsədilə model kimi istifadə olunur. Beş il davam edəcək eksperiment başa çatdıqdan sonra nümunələr gələcək müqayisəli analizlər üçün kriokonservasiya ediləcək.