Azərbaycan Tibb Universitetinin (ATU) Ağız və Üz-çənə Cərrahiyyəsi kafedrasının əməkdaşları Sinqapurda keçirilən Beynəlxalq Üz-çənə Cərrahları Assosiasiyasının (ICOMS 2025) Ümumdünya Konqresində iştirak ediblər.

Bu barədə Aztibb.az-a ATU-dan məlumat verilib.

Bildirilib ki, 82 ölkədən 2000-dən çox iştirakçının qatıldığı konqres üz-çənə cərrahiyyəsi sahəsində fəaliyyət göstərən mütəxəssislərin qlobal gücünü və birliyini əks etdirir. Bu ixtisas sahəsi insanın zahiri görkəmini və bununla da sosial statusunu müəyyən edən ən mühüm anatomik sahələrdən birinin bərpası və təkmilləşdirilməsinə yönəlib. 150-dən çox elmi sessiyanı əhatə edən konqresdə ən son tədqiqatlar, zəngin klinik təcrübə və maraqlı müzakirələr təqdim edilib, üz-çənə cərrahiyyəsinin gələcək inkişaf istiqamətlərini müəyyənləşdirilib. 

Əsasən ATU-nun əməkdaşlarının təmsil olunduğu Azərbaycan Ağız və Üz-çənə Cərrahları Cəmiyyəti bu tədbirdə iştirak edən qurumlar arasında “Fəxri Qonaq Cəmiyyət” statusunu alıb. Azərbaycan nümayəndə heyətinə Azərbaycan Tibb Universitetinin Ağız və Üz-çənə Cərrahiyyəsi kafedrasının müdiri professor Ç.R.Rəhimov rəhbərlik edib. Nümayəndə heyətində həmçinin dosent F.İ.Həsənov, dosent N.N.Soltanova, dosent İ.M.Fərzəliyev, dosent T.A.Əliyev iştirak etmiş və dəvət olunmuş məruzəçilər  qismində çıxış ediblər. Kafedranın assistentləri R.Ə.İbrahimov və E.M.Əliyev poster formatında işlərini təqdim etmiş, doktorant G.A.Əliyeva isə şifahi təqdimatı tədbir iştirakçılarının diqqətinə çatdırıb. 

Azərbaycan nümayəndə heyətinin üzvləri şəxsi görüşlər zamanı müxtəlif ölkələrdən olan həmkarlarına ölkənin nailiyyətləri, mədəni həyatının rəngarəngliyi, Azərbaycan xalqının ənənəvi qonaqpərvərliyi və turizm baxımından cəlbediciliyi barədə məlumat veriblər.