Azərbaycan Respublikası Səhiyyə Nazirliyi və Qida Təhlükəsizliyi Agentliyi (AQTA) tərəfindən ali təhsil müəssisələrində maarifləndirilmə aparılıb, elektron siqaretlərin (veyplərin) sağlamlığa mənfi təsirləri barədə geniş məlumat verilib.

 

Bu barədə Aztibb.az-a AQTA-dan bildirilib.

 

Azərbaycan Memarlıq və İnşaat Universiteti, Azərbaycan Dövlət Pedaqoji Universiteti, Bakı Slavyan Universiteti, Azərbaycan Tibb Universiteti, Azərbaycan Dillər Universitetində tələbələrlə görüş keçirilib. Səhiyyə Nazirliyi İctimai Səhiyyə və İslahatlar Mərkəzinin (İSİM) şöbə müdiri İnara Makayeva gənc nəsil arasında keçirilən maarifləndirici tədbirlərin məqsədini və əhəmiyyətini vurğulayıb, gəncləri güclü asılılıq yaradan zərərli vərdişlərdən uzaq olmağa çağırıblar. İSİM-in əməkdaşları – Nərmin Azadova və Şəhla Kazımova geniş təqdimatla çıxış ediblər. Elektron siqaretlərdən istifadənin sağlamlığa təhlükəli təsirləri, veyp mayelərinin tərkibində müxtəlif kimyəvi maddələr, o cümlədən nikotin, ağır metallar və insan orqanizminə təsir edən bir çox zərərli komponentlər barədə ətraflı məlumat verilib. Vurğulanıb ki, nikotinin yüksək dərəcədə asılılıq yaratması ilə yanaşı, ürək-damar, tənəffüs və sinir sisteminə mənfi təsirləri elmi araşdırmalar tərəfindən təsdiqlənib.

 

Görüşün sonunda suallar cavablandırılıb və İSİM tərəfindən hazırlanaraq çap olunan maarifləndirmə materialları təqdim edilib.