Harvard Universitetinin alimləri insanlıq tarixində ən ağır dövrün eramızın 536-cı ili olduğunu müəyyən ediblər. "Science" jurnalında dərc olunan tədqiqatın nəticələri göstərib ki, məhz həmin dövrdə Avropa və Asiyanı əhatə edən qlobal iqlim anomaliyaları, fəlakətlər genişmiqyaslı sosial və tarixi sarsıntıları tətikləyib.

Aztibb.az-ın məlumatına görə, 18 ay ərzində geniş ərazilər Günəş işığını demək olar ki, tamamilə bloklayan qalın dumana bürünüb. Tədqiqatçılar hesablayıblar ki, o dövrün gündüz işıqlanması ay parlaqlığından artıq olmayıb. Bu, orta temperaturun 2.5 dərəcə düşməsi ilə nəticələnib. Kəskin soyuqlaşma məhsul qıtlığına və kənd təsərrüfatının çökməsinə, ardınca isə kütləvi aclığa gətirib çıxarıb.

Qrenlandiyadan götürülmüş buz nümunələrinin təhlili zamanı əldə edilmiş iqlim məlumatları sayəsində atmosferdə kükürdün yüksək konsentrasiyası aşkar olunub. Bu, 536-cı ildə böyük miqyaslı vulkan püskürməsinin baş verdiyini göstərir. Ekoloji və ərzaq fəlakəti tarixdə qeydə alınmış ilk pandemiyalardan biri olan Yustinian taununun yayılması ilə müşayiət olunub. Xəstəlik demək olar ki, bütün dünyanı bürüyüb, əhalinin təxminən yarısının həyatına son qoyub. Bundan əlavə, ardıcıl olaraq baş verən zəlzələlər, daşqınlar bütöv sivilizasiyaların dayanıqlılığını sarsıdıb. Bəzi tarixçilər hesab edirlər ki, məhz bu fəlakətlər Qərbi Roma imperiyasının süqutunun və Avropanın Orta əsrlər dövrünə keçməsinin səbəblərindən biri olub.