17 iyun - Azərbaycanda tibb işçiləri günüdür - Peşə bayramının tarixi - aztibb.az AZƏRBAYCANIN SƏHİYYƏ XƏBƏR PORTALI

17 iyun - Azərbaycanda tibb işçiləri günüdür - Peşə bayramının tarixi

17.06.2020 12:12

Ən çətin anlarda, özümüzü narahat hiss etdiyimiz ən ağır günlərdə onlara üz tuturuq. Günün hansı saatı müraciət etməyimizdən asılı olmayaraq həmişə bizi diqqətlə dinləyir, şəfalı əlləri ilə ağrılarımızı yüngülləşdirir, dərdlərimizə məlhəm olurlar. Bu gün onların - tibb işçilərinin peşə bayramıdır.

Aztibb.az xəbər verir ki, hər il iyunun 17-si xalqımızın ümummilli lideri Heydər Əliyevin 2001-ci il iyunun 4-də imzaladığı Sərəncama əsasən, ölkəmizdə Tibb İşçilərinin Peşə Bayramı Günü kimi qeyd olunur.

Həmin gün öz tarixini Azərbaycan Xalq Cümhuriyyətindən götürür. 1918-ci il mayın 28-də Azərbaycan dövlət müstəqilliyini elan etdikdən sonra Milli hökumət iyunun 16-da Tiflisdən Gəncəyə köçüb. Səhəri gün hökumətin kabinəsində ilk Səhiyyə və Sosial Təminat naziri vəzifəsi Xudadat bəy Rəfibəyliyə tapşırılıb.

Əsrdən artıq müddətdə Azərbaycan səhiyyəsi çox böyük inkişaf yolu keçib. Son illər Azərbaycan səhiyyəsinin idarə olunması, tibb müəssisələrinin maddi-texniki bazasının gücləndirilməsi, yeni tibbi texnologiyaların tətbiqi, köklü kadr islahatları və aparılan digər tədbirlər onu dünyanın qabaqcıl ölkələrinin səviyyəsinə çıxarmağa imkan yaradıb.

Tibb müəssisələrinin təmir və bərpası, vətəndaşların pulsuz dərman vasitələri və preparatlarla təmin olunması, onların müalicəsi, regionlarda diaqnostika mərkəzlərinin tikilərək istifadəyə verilməsi, xüsusilə uşaqların bütün tibbi xidmətlərlə ən yüksək səviyyədə əhatə olunması səhiyyə sahəsində aparılan islahatların əsas istiqamətlərini təşkil edir.

Ölkəmizdə 640-dan artıq yeni tikilmiş və ya əsaslı təmirdən çıxmış tibb müəssisəsi müasir avadanlıqlarla təmin olunub. Ötən ilin statistikasına görə, hazırda ölkəmizdə 31,9 min həkim, 52,9 min tibb işçisi əhalinin sağlamlığı keşiyində dayanır.

Bu gün Azərbaycan səhiyyəsi dünyanı əhatə edən koronavirus pandemiyası ilə mübarizə aparır. Bir çox həkimlər virusun qurbanı olub, bəziləri xəstəxanalarda əhalinin sağlamlığının qorunması uğrunda əsl qəhrəmanlıq nümayiş etdirirlər.

Aztibb.az səhiyyə xəbər portalı tibb işçilərini peşə bayramı münasibətilə təbrik edir, bu çətin və şərəfli yolda onlara uğurlar arzu edir.