Ali təhsil müəssisələri arasında keçirilmiş idman yarışlarının qalibi olan Azərbaycan Tibb Universiteti (ATU) tələbələrinin mükafatlandırma mərasimi keçirilib. Mərasimdə Nəsimi rayon İcra Hakimiyyətinin nümayəndələri, rayon Gənclər və idman sektorunun əməkdaşları və tələbələr iştirak ediblər.

Bu məlumat Aztibb.az-a ATU-dan verilib.

Tədbiri giriş sözü ilə açan ATU-nun “Təbib” İdman Klubunun sədri Qələndər Aslanov Bədən Tərbiyəsi və İdman Günü münasibətilə təşkil olunmuş 8-ci idman yarışının Bakı Şəhər Gənclər və İdman İdarəsi və Nəsimi rayon Gənclər və idman sektorunun birgə təşkilatçılığı keçirildiyini diqqətə çatdırıb. Bildirib ki, futzal, badminton və stolüstü tennis yarışları təşkil olunub. Futzal yarışlarında 112 tələbə iştirak edirdi. 2 həftə davam edən yarışlarda Azərbaycan Tibb Universitetinin tələbələri qalib olublar.

Bundan başqa, ali təhsil müəssisələri arasında Universiada keçirilib. Martın 1-4-də keçirilən yarışlarda tələbələrimiz şahmat üzrə yalnız İdman Akademiyasının tələbələrinə məğlub olaraq 2-ci yeri tutublar.

Nəsimi rayon Gənclər və idman sektorunun müdiri Yusif Babanlı çıxışında bildirib ki, Azərbaycan dünyada idman ölkəsi kimi tanınır: “Ulu öndər Heydər Əliyev hakimiyyətə gələndən sonra idman sahəsinə diqqət və qayğı artdı. 2005-ci ildən etibarən isə martın 5-i cənab Prezident İlham Əliyevin sərəncamı ilə Bədən Tərbiyəsi və İdman Günü kimi qeyd olunur”. Ölkəmizdə keçirilən  beynəlxalq səviyyəli yarışlar, müxtəlif idman növləri üzrə gənclərimizin əldə etdiyi nailiyyətlərdən söhbət açan Y.Babanlı, ATU-nun qalib tələbələrini təbrik edib.

Nəsimi rayon İH başçısının 1-ci müavini Gülarə Verdiyeva universitetimizin tələbələrinin idman sahəsindəki uğurlarının təsadüfi olmadığını, ATU-da bunun üçün hər cür şərait yaradıldığını deyib: “Azərbaycan Tibb Universitetinin gözəl bir ənənəsi var. Hər il martın 5-i ərəfəsində müxtəlif idman yarışları keçirilir. Bu il də yüksək səviyyədə təşkil olunmuş yarışların fərdi və komanda qaliblərini təbrik etməkdən məmnunam. Azərbaycan gəncliyinin sağlam olması və ardıcıl inkişafı dövlət siyasətinin prioritet istiqamətlərindən biridir”.

Tədbirin sonunda ATU-nun prorektoru Tağı Əhmədov, o cümlədən Yusif Babanlı və Gülarə Verdiyeva qaliblərə mükafatları təqdim ediblər.