Artıq bir neçə ildir ki, Azərbaycan Tibb Universitetində (ATU) ödənişli əsaslarla təhsil alan tələbələrdən yüksək göstəricisi olanların dövlət hesabına təhsilə keçidi təmin olunur. Bu dəfə də müxtəlif kurs və fakültələrin ümumilikdə 19 tələbəsi bu şansı qazanıb. 

Universitetdən Aztibb.az-a verilən məlumata görə, ATU-nun rektoru, professor Gəray Gəraybəyli həmin tələbələrlə görüşüb. O, bu addımın həm tələbələrin ailələrinə dəstək, həm də gənclərin təhsil səviyyəsinin yüksəltməsi, inkişafı üçün müəyyən stimul olduğunu bildirib. 

Prof. G.Gəraybəyli bu təşəbbüsün gerçəkləşməsində Dövlət İmtahan Mərkəzinin rolunu xüsusi vurğulayıb. Rektor ATU tələbələri arasında Təhsil Krediti Fondunun imkanlardan yararalanan gənclərin olduğunu da xatırladaraq, gələcəkdə bu cür təşəbbüslərin artırılması istiqamətində bir sıra işlərin görüləcəyini bildirib.

Görüşdə ATU-nun Tədris departamentinin rəhbəri, dosent Kamandar Yaqubov keçid proseduru haqqında danışaraq qeyd edib ki, dövlət hesabına plan yerləri boşaldıqca, ödənişli təhsil alan və akademik göstəriciləri yüksək olan tələbələri ora keçirmək imkanı yaranır. Bu zaman təhsil illərində tələbələrin topladığı ballar nəzərə alınır. K.Yaqubov ATU-da 7 mindən çox tələbə olduğunu, universitetin xarici tələbə sayına görə ölkədə ilk yerdə olduğunu diqqətə çatdırıb.

Qeyd edək ki, bu il müxtəlif kurs və fakültələrin ümumilikdə 19 nəfər (9 nəfər II kurs, 1 nəfər III kurs, 4 nəfər IV kurs, 5 nəfər də V kurs tələbəsi) Bu tələbələr I müalicə-profilaktika, II müalicə-profilaktika, İctimai səhiyyə və Stomatologiya fakültəsində təhsil alırlar.