Hacıqabul Rayon Mərkəzi Xəstəxanasında Hacıqabul Rayon Mərkəzi İcra Hakimiyyətinin təşkilatçılığı, Milli Hematologiya və Transfuziologiya Mərkəzinin, Mərkəzi Qan Bankının əməkdaşlarının təşəbbüsü ilə qanvermə aksiyası təşkil edilib.

Aztibb.az-a Xəstəxanadan verilən məlumata görə, rayon ictimaiyyəti, idarə, müəssisə və təşkilatlar qana ehtiyacı olan insanların köməyinə çatmaq üçün aksiyaya qoşulublar.

Aksiyanın əsas məqsədi irsi qan xəstəliklərindən, o cümlədən talassemiya və hemofiliyadan əziyyət çəkən insanlara dəstək olmaq və cəmiyyətin diqqətini bu məsələyə yönəltməkdir.

Mərkəzi Qan Bankının xüsusi tibb briqadasının həkim-hemotoloqları rayon mərkəzi xəstəxanasının tibb personalı ilə birgə könüllü donorları müayinə etdikdən sonra onlardan qan götürüblər.

Gün ərzində davam edən humanitar aksiya çərçivəsində 100-ə qədər donordan qan götürülüb. Tədarük olunan qan nümunələri Respublika Mərkəzi Qan Bankına göndəriləcək və irsi qan xəstəliklərinin müalicəsində istifadə olunacaq.