Tanınmış həkim Vasif İsmayıl Musavat.com saytının “Facebook” üzərindən baş tutan canlı yayımında müsahibə verib. O, koronavirusun hələ aylarla davam edəcəyini deyib: insanlar 2021-ci ilin ortalarına kimi bu virusla yaşamağa hazır olmalıdır.
Bildirib ki, əgər insanlar məsuliyyətli davranarsa və qaydalara əməl edərsə bir çox iş yerləri açıla, öz fəaliyyətini müəyyən məhdudiyyətlərlə davam etdirə bilər.
O, koronavirusun müalicəsinin baha olduğunu, eyni zamanda artıq bir çox xəstəxanalarda yer məhdudiyyətinin müşahidə edildiyini qeyd edib: bunları nəzərə alaraq insanlar özlərini maksimum şəkildə qorumalı, sosial izolyasiya qaydalarına əməl etməlidir.
Həkim bildirib ki, pandemiyanın qarşısının alınması ilə bağlı hökumət tərəfindən görülən son tədbirlər müsbət nəticə göstərməkdədir. İnsanların əksəriyyəti qaydalara riayət etməyə başlayıb. Gözəllik salonları və bərbərxanaların açılması doğru qərardır. Kiçik sahibkarlıq fəaliyyəti ilə məşğul olan şəxslərin də öz fəaliyyətini davam etdirməsi üçün şərait yaradılmalıdır. Təbii ki, bu zaman ciddi nəzarət olmalıdır.
O, rayonlara gediş-gəlişin bərpa olunması, eləcə də istirahət zonalarının açılmasının da mümkün olduğunu, lakin insanların son dərəcə diqqətli davranmasının zəruriliyini vurğulayıb.
V.İsmayıl Bakı şəhərində çimərliklərin açılması ilə bağlı məsələyə də münasibət bildirib: çimərliklərin açılmasına qarşıyam. Əgər bu baş verərsə, insanların çimərliklərə ciddi axını olacaq. Onların sosial məsafə qaydalarına əməl edəcəklərinə inanmıram. İnsanların daha çox açıq ərazilərə getməsinin tərəfdarıyam:
“D vitamini məsələsinə gəlincə dağ havasından alınan D vitamini dənizə getdiyimiz zaman dəridə yaranan vitamindən daha xeyirlidir. D vitamininin qəbulu baxımından dağda 2 saat hava almaq, dənizdə 3 saat vaxt keçirməyə bərabərdir.
Nəzərə alsaq ki, payız-qış aylarında üst tənəffüs yolları xəstəlikləri artır. Bu da koronavirusun daha çox yayılması ehtimalını artırır. Ona görə insanların yaşa uyğun olaraq profilaktik dozada D vitamini preparatı qəbul etməsi bədəndə immunitetin yaranmasına səbəb olacaq”.
Həkim insanları bir daha qaydalara riayət etməyə - əllərini tez-tez yumağa, sosial məsafə saxlamağa və maska taxmağa çağırıb. O, həmçinin uzun müddət maska taxmağın heç bir ziyanı olmadığını qeyd edib.
