Gələn il Mərkəzi Asiyada xərçəng xəstələrinə proton terapiyası verən ilk onkoloji mərkəz Qazaxıstanda açılacaq.

Aztibb.az “TRT Haber”ə istinadən xəbər verir ki, Qazaxıstan Baş Nazirliyinin verdiyi məlumata görə, baş nazir Əlihan İsmayılov Astanada gələn il istifadəyə veriləcək Milli Elmi Onkologiya Mərkəzinin yeni binası ilə tanış olub.

Ölkədə hər il 37 mindən çox xərçəng hadisəsinin və 13 mindən çox xərçənglə bağlı ölüm faktının qeydə alındığı barədə məlumatı paylaşan İsmayılov, “Çətin bir layihə idi, lakin tikintidə müvafiq təcrübəyə malik beynəlxalq şirkət iştirak etdi. Məqsəd mərkəzin beynəlxalq standartlara uyğunluğunu təmin etməkdir”, dedi.

Baş nazir 2024-cü il avqustun 1-dək mərkəzin tam gücü ilə istifadəyə verilməsi üçün lazımi prosesin aparılmasını tapşırıb.

Tikinti işlərinin 90 faizinin artıq yekunlaşdığı, radiasiya və nüvə təbabəti sahəsində yüksək texnologiyalarla təchiz edilmiş 210 nəfərlik çarpayılıq mərkəzdə proton terapiya mərkəzi də fəaliyyət göstərəcək.

Qazaxıstan Mərkəzi Asiyada xərçəng xəstələri üçün proton terapiyasından istifadə etməyə başlayan ilk ölkə olacaq.

Mərkəzin onkoloji cərrahı Adilbek Mukacanov mövzu ilə bağlı jurnalistlərə açıqlamasında deyib: "Bu, Qazaxıstan və Orta Asiyada proton terapiyasının aparılacağı yeganə mərkəz olacaq. Dünyada belə mərkəzlərin sayı 100-ü keçmir".

O, proton terapiyasının xüsusiyyətlərini açıqlayıb: "Ən mühüm xüsusiyyət şüalanmanın daha məqsədyönlü olmasıdır. Bu, uşaqlar və zəifləmiş xəstələrə gəldikdə xüsusilə vacibdir. Minimum radiasiyaya məruz qalmasını və ətrafdakı toxumaların minimal zədələnməsini təmin edir. Eyni zamanda, ikinci dərəcəli şüalanma şişlərinin inkişaf ehtimalı da minimuma endiriləcəkdir".