Səhiyyə Nazirliyinin İctimai Səhiyyə və İslahatlar Mərkəzi (İSİM) tərəfindən Biləsuvar Rayon İcra Hakimiyyəti ilə birgə “Ürəyinizi qoruyun!” adlı maarifləndirici aksiya keçirilib.

 

İSİM-dən Aztibb.az-a bildirilib ki, Biləsuvar şəhərində 25 oktyabr 2023-cü ildə təşkil olunan aksiya çərçivəsində iştirakçılar ilkin müayinələrə (boy, çəki, təzyiq və nəbzin ölçülməsi) dəvət edilib, onlara ürək-damar xəstəliklərinin əsas risk amilləri barədə məlumat verilib.

 

Qeyd olunub ki, müasir dövrdə ürək-damar xəstəliklərindən əziyyət çəkənlərin sayının çoxalması bir sıra amillərlə sıx bağlıdır. Əsas risk amillərinə isə, yüksək qan təzyiqi, qanda xolesterin və şəkərin miqdarının artması, tütünçəkmə, fiziki passivlik, spirtli içkilərdən sui-istifadə, psixoloji stres, artıq çəki, piylənmə və qeyri-sağlam qidalanma aiddir.

 

İştirakçılara düzgün və balanslı qidalanma ilə bağlı məlumat verilib, sağlam həyat tərzi seçmək təşviq edilib. Onlara ürək-damar xəstəliklərinin profilaktikasına dair İSİM tərəfindən hazırlanaraq nəşr edilən maarifləndirici materiallar paylanılıb.