Rusiya alimləri tərəfindən təklif edilən ağciyər xərçəngi üçün sağ qalma proqnozu modeli mitoxondrilərin keyfiyyətinə nəzarət edən zülal molekullarının səviyyəsinin öyrənilməsinə əsaslanır.

Aztibb.az “SM.News” xəbər agentliyinə istinadən yazır ki, alimlər ağciyər adenokarsinoması olan xəstələrin sağ qalması barədə proqnoz verməyə və onlar üçün effektiv müalicə seçməyə imkan verən yeni model haqqında məlumatı açıqlayıblar.

Model mitoxondriyanın keyfiyyətinə nəzarət edən zülal molekullarının səviyyəsinin öyrənilməsini nəzərdə tutur.

Mitoxondrilərin fəaliyyəti pozularsa, orqanizmdə patoloji proseslər baş verməyə başlayır, xərçəng əmələ gəlir.

Mitoxondrilərin vəziyyətini tənzimləyən mexanizmlər xüsusi zülallar tərəfindən idarə olunur, onların səviyyəsi bu mitoxondriyaların nə qədər yaxşı işlədiyini anlamaq üçün istifadə edilə bilər.

Müvafiq tədqiqatlar apardıqdan sonra alimlər xəstələrin növbəti 12 ay, üç il, beş il yaşamaq şanslarını qiymətləndirməyə imkan verən proqnostik model tərtib ediblər.