Çəpgözlük gözlərin müştərək fəaliyyətinin və paralelliyinin pozulmasıdır. Hər göz almasını idarə edən 6 ədəd xarici əzələsi var. Bu əzələlərdən biri və bir neçəsi daha güclü və ya daha zəif olduğu halda çəpgözlük yarana bilər. Bir göz düz baxan zaman, o biri göz daxilə burun tərəfə, xaricə qulaq tərəfə, yuxarı alın tərəfə və ya aşağı ayağa tərəf baxır.

Aztibb.az xəbər verir ki, cərrah oftalmoloq Dr. Emin Əlihüseynlinin sözlərinə görə, anadangəlmə çəpgözlük halları 3-6 ay və 1 yaş arasında körpələrdə yaranır.

Qeyd edib ki, çəplik bucağı çox böyük olur və demək olar ki, hər kəs tərəfindən hiss edilə bilir. Adətən belə çəpgözlük halları refraksiya qüsurları ilə əlaqədar deyil.

“Əzələ iflici adətən uşaqlıq və yeniyetməlik dövrünə təsadüf edir, travma, xüsusi ilə baş zədəsi, ağırlaşmış doğuş və keçirilmiş yüksək hərarətdən sonra baş verir. Bəzi hallarda bu iflic başda şişin, kistanın və ya quruluş pozğunluğunun nəticəsində inkişaf edir”, - deyə oftalmoloq bildirib.

Böyüklərdə bu xəstəliyin səbəbi travma, şəkərli diabet, qalxanvari vəzinin xəstəliyi, dağınıq skleroz kimi mərkəzi sinir sisteminə təsir göstərən xəstəliklər ola bilər.