Avqustun 30-da Şəkidə ilkin səhiyyə xidməti müəssisələrində çalışan həkimlər üçün "Vərəmin aşkarlanması, nəzarətli müalicə və profilaktikasında ilkin səhiyyə xidmətinin rolu” adlı təlim keçirilib.

Şəki Rayon Mərkəzi Xəstəxanasından Aztibb.az-a verilən xəbərə görə, təlim “Elmi-Tədqiqat Ağciyər Xəstəlikləri İnstitutu” publik hüquqi şəxsin 2023-cü ildəki fəaliyyət planına uyğun olaraq Milli Vərəm Proqramı çərçivəsində baş tutub.

Təlimdə Milli Vərəm Proqramı İşçi Qrupunun koordinator həkimi Aysel Aslanova, ETAGXİ-un Referans laboratoriyasının müdiri, həkim-laborant Mehriban Seyfəddinova, eləcə də Şəki, Qax, Zaqatala rayonlarının ilkin səhiyyə xidmətlərində çalışan həkimlər iştirak ediblər.

Əvvəlcə Aysel Aslanova vərəm xəstəliyinin erkən aşkar edilməsi, aktiv skrininqlərin aparılması, yoluxma sayının qarşısının alınması məqsədilə həyata keçirilən nəzarətli müalicə üsulları barədə iştirakçılara ətraflı məlumat verib.

Daha sonra Mehriban Seyfəddinova vərəmin laboratoriyada aşkar edilməsi üsullarından danışıb.

Tədbirin sonunda iştirakçılarla geniş müzakirələr aparılıb və onlara sertifikatlar təqdim edilib.