TƏBİB-in tabeliyində fəaliyyət göstərən “Neftçala Rayon Mərkəzi Xəstəxanası” Publik Hüquqi Şəxsdə "Qan ver, həyat qurtar!" şüarı altında növbəti qanvermə aksiyası keçirilib.

Bu barədə Aztibb.az-a Rayon Xəstəxanasından xəbər verilib.

Bildirilib ki, tibbi aksiya Azərbaycan Respublikası Səhiyyə Nazirliyi Milli Hematologiya və Transfuziologiya Mərkəzinin Mərkəzi Qan Bankı və Neftçala Rayon İcra Hakimiyyətinin birgə təşəbbüsü ilə baş tutub.

Aksiyada Neftçala rayonu ərazisində fəaliyyət göstərən idarə, müəssisə və təşkilatların əməkdaşları, eləcə də ictimaiyyətin nümayəndələri iştirak ediblər.

Respublika Mərkəzi Qan Bankının tibb işçiləri tərəfindən əvvəlcə sağlamlıq imkanları dəyərləndirilən donorlar müəyyən olunub. Toplanan qan ehtiyatı talassemiya, hemofiliya və leykoz xəstəliyindən əziyyət çəkən xəstələr üçün istifadə olunacaq.