AR Elm və Təhsil Nazirliyinin akademik Abdulla Qarayev adına Fiziogiya İnstitutunun baş direktoru, professor Ulduz Həşimova, İmmunofiziologiya və eksperimental transplantologiya laboratoriyasının aparıcı elmi işçisi, biologiya üzrə fəlsəfə doktoru Xatirə Səfixanova, Ekotoksikologiya laboratoriyasının baş elmi işçisi, tibb üzrə fəsəfə doktoru Aliya Qaysinanın həmmüəllif olduğu məqalə Ukraynanın “The Journal of Neuroscience of B.M.Mankovskyi” (“B.M.Mankovski adına Nevrologiya jurnalı”) və Sinqapurun “International Journal of Clinical Medicine and Bioengineering” (“Beynəlxalq Klinik Tibb və Biomühəndislik Jurnalı”) adlı nüfuzlu jurnallarında çap olunub.

Bu barədə Aztibb.az-a AMEA-dan məlumat verilib.

Dövlət Gömrük Komitəsi Tibbi Xidmət İdarəsi və Mərkəzi Gömrük Hospitalının mütəxəssisləri ilə birgə hazırlanan “COVID-19 xəstələrinin xəstəxanaya yerləşdirilməsi zamanı qan nümunələrinin cins və yaş xüsusiyyətləri” adlı məqalə COVID-19 xəstələrində bəzi hemotoloji parametrlərin cins və yaş baxımından təhlilinə həsr olunub.

Aparılan tədqiqatın əsas məqsədi koronavirusa yoluxmuş və xəstəxanaya yerləşdirilmiş insanlarda xəstəliyin erkən mərhələsində qan profilini araşdırmaq olub. Tədqiqat zamanı COVID-19-a yoluxmuş 332 xəstənin hemoqrammalarının retrospektiv təhlilindən istifadə edilib. Məlum olub ki, daha ağır xəstələrdə limfositlərin və eozinofillərin sayı azalır.

Onu da qeyd etmək lazımdır ki, qan nümunələrinin kliniki dəyəri xəstələrin cinsindən və yaşından asılı olaraq əhəmiyyətli dərəcədə dəyişir. Bu isə diaqnoz və xəstəliyin gedişatının qiymətləndirilməsi zamanı nəzərə alınmalı olan vacib amillərdən biridir və xəstələrin müalicəsinin bu parametrlərdən istifadə olunmaqla təyin edilməsi məqsədəuyğundur.