Gəncə Şəhər Birləşmiş Xəstəxanasının (ŞBX) nəzdindəki Akademik Zülfüqar Məmmədov adına Xəstəxananın Təcili yardım şöbəsi yenidən qurularaq istifadəyə verilib.

 

Bu barədə Aztibb.az-a Gəncə ŞBX-dan xəbər verilib.

 

Bildirilib ki, müasir tibbi avadanlıqlarla təchiz edilən Təcili yardım şöbəsi 10 çarpayılıqdır və burada vətəndaşlara təcili və təxirəsalınmaz yardım göstərilir. Şöbədə yaşıl, sarı, qırmızı zona yaradılıb, həmçinin burada ilkin travmatoloji xidmət göstərilməsi üçün də hər cür şərait mövcuddur. Bundan başqa, qabaqcıl ölkələrdə təcili və təxirəsalınmaz tibbi yardımın təşkilində geniş istifadə olunan “çeşidləmə” (“triaj”) sisteminin tətbiqinə başlanılıb.

 

Şöbədə ümumilikdə 16 tibb personalı fəaliyyət göstərir, şöbə müdiri Turanə Rüstəmovadır.

 

Qeyd edək ki, iyun ayının 25-də İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev, İdarə Heyəti sədrinin müavini Nigar Bayramova və Tibbi Ərazi Bölmələrini İdarəetmə Birliyinin (TƏBİB) icraçı direktoru Vüqar Qurbanovun iştirakı ilə Gəncə ŞBX-nin tabeliyində olan tibb müəssisələrində yenidən qurulan şöbələrin açılışları həyata keçirilib.