Səhiyyə Nazirliyinin İctimai Səhiyyə və İslahatlar Mərkəzi (İSİM) tərəfindən Mədəniyyət Nazirliyinin Xaçmaz Regional Mədəniyyət İdarəsi ilə birgə Şabran şəhərində əhali üçün təşviqat aksiyası keçirilib.

 

Aztibb.az-a Səhiyyə Nazirliyindən bildirilib ki, yerli sakinlər, ictimaiyyət nümayəndələri və gənclərin fəal iştirak etdiyi aksiya tütünçəkmə və narkomaniyanın təhlükəli fəsadları barədə əhali arasında geniş maarifləndirmə aparılması məqsədilə təşkil olunub.

 

Narkomaniya qarşı maarifləndirici aksiyada sağlam həyat tərzi geniş təbliğ və təşviq olunub, tütünçəkmə və narkomaniyanın fəsadlarını təsvir edən rəsmlər sərgilənib. Səhiyyə işçiləri, ictimai səhiyyə mütəxəssisləri tərəfindən iştirakçılara tütün məmulatları və narkotik maddələrin fəsadları barədə ətraflı məlumat verilib, onlara İSİM tərəfindən yaradılan “Tütündən imtina et” mobil tətbiqindən və tütündən imtina üzrə “Qaynar xətt”dən faydalanmaq tövsiyə olunub.

 

Sonda aksiya iştirakçılarına İSİM tərəfindən hazırlanan maarifləndirici nəşrlər və broşürlar paylanılıb.