"Həkimlərimizi tanıyaq!” rubrikamızda saytımızın oxucularına zəngin iş təcrübəsinə malik peşəkar həkim-uroloq Şahin Qoşunəliyev haqqında məlumatları təqdim edirik.

 

Şahin Əli oğlu Qoşunəliyev 1961-ci ildə İmişli rayonunun Sarxanlı kəndində anadan olub. 1980-1986-cı illər ərzində Azərbaycan Dövlət Tibb Universitetinin Müalicə-profilaktika fakültəsində təhsil alıb. 1987-1990-cı illərdə Salyan Rayon Mərkəzi Xəstəxanasının Təcili Tibbi Yardım Stansiyasında işləyib.

 

O, 1990-cı ildə Azərbaycan Dövlət Həkimləri Təkmilləşdirmə İnstitutunun Urologiya və operativ nefrologiya kafedrasında ixtisasartırma kursunu keçərək həkim-uroloq ixtisasına yiyələnib. 1990-1992-ci illərdə Neftçala Rayon Mərkəzi Xəstəxanasında həkim-uroloq vəzifəsində çalışıb. 1992-1994-cü illərdə Azərbaycan Dövlət Həkimləri Təkmilləşdirmə İnstitutunun Urologiya və operativ nefrologiya kafedrasında klinik ordinatura keçib.

 

1994-cü ildən Akademik Mirməmməd Cavadzadə adına Respublika Kliniki Uroloji Xəstəxanasında Keyfiyyətə nəzarətin idarəetməsi komitəsinin rəhbəri və həkim-uroloq kimi çalışır.