Yeni bir araşdırmaya görə, süni intellekt artıq üç ilə qədər insanın mədəaltı vəzi xərçənginin olub-olmayacağını proqnozlaşdıra bilir.

Bu barədə Aztibb.az medimagazin.com.tr-yə istinadla xəbər verir.

Tədqiqat göstərib ki, süni intellekt xəstənin tibbi qeydlərindən istifadə edərək erkən mərhələlərində bilinməsi çətin olan ölümcül xəstəlik üçün kimin risk altında olduğunu müəyyən edə bilər.

"Nature Medicine" jurnalında dərc edilən araşdırma, süni intellektə əsaslanan əhalinin skrininqindən istifadə edərək mədəaltı vəzi xərçənginin potensial hallarının aşkar oluna biləcəyini göstərib.

Əhalinin skrininqi bir qrup insan arasında müəyyən xüsusiyyətin yayılmasına baxmaq üçün tibb mütəxəssisləri tərəfindən genetik test və ya oxşar üsulların tətbiqidir. O, müəyyən xəstəliklərin spesifik biomarkerini müəyyən etməyə kömək edə bilər.

Tədqiqata Harvard Tibb Məktəbi və Kopenhagen Universitetinin tədqiqatçıları rəhbərlik ediblər.

Araşdırmada tədqiqatçılar Danimarka və ABŞ-dan olan 9 milyon xəstənin klinik məlumatlarına süni intellekt alqoritmini tətbiq ediblər. Onlar xəstə məlumatlarından diaqnostik kodları oxumaq və onları mədəaltı vəzi xərçəngi ilə əlaqələndirmək üçün süni intellektə öyrənmə modellərini öyrədiblər.

Tədqiqatçılar müxtəlif vaxtlarda (altı ay, bir il, iki il və üç il) potensial diaqnoz üçün süni intellekt modellərinin müxtəlif versiyalarını sınayaraq onların metodunun "mədəaltı vəzi xərçəngini kimin inkişaf etdirəcəyini proqnozlaşdırmaqda indiki əhali miqyasında olduğundan əhəmiyyətli dərəcədə daha dəqiq olduğunu" tapıblar. 

Bununla belə, yeni texnologiya hələ ilkin mərhələdədir və daha bir çox sınaqlardan keçməlidir.