Ümummilli Lider Heydər Əliyevin anadan olmasının 100 illiyi çərçivəsində Azərbaycan Tibb Universitetinin (ATU) təşkilatçılığı, Ekologiya və Təbii Sərvətlər Nazirliyinin dəstəyi ilə Bakının Qaradağ rayonunun Müşfiqabad qəsəbəsində ağacəkmə aksiyası keçirilib.

 

Bildirilib ki, aksiyada ATU-nun rektoru Gəray Gəraybəyli, ekologiya və təbii sərvətlər naziri Muxtar Babayev, həmçinin universitetin və nazirliyin kollektivləri iştirak ediblər.

 

Aksiyanın keçirilməsində əsas məqsəd Ümummilli Liderin yaşıllaşdırma ənənələrini davam etdirməklə yanaşı, ölkəmizdə ekoloji vəziyyətin sağlamlaşdırılması, cəmiyyətdə təbiətə qayğını təbliğ etməkdən ibarətdir. Həmçinin, ağac əkilməsini və yaşıllıqların çoxaldılmasını təşviq edərək ətraf mühitin qorunmasına töhfə verməklə ulu öndər Heydər Əliyevin əziz xatirəsini yad etməkdir. “Heydər Əliyev İli” çərçivəsində təşkil olunan aksiyada qeyd olunub ki, bu il ərzində ölkə ərazisində 3 milyon ağacın əkilməsi hədəf götürülüb. Bildirilib ki, bu gün əkilən hər bir ağac gələcək nəsillərə yadigar qalmaqla, həm də paytaxtda, ümumilikdə Abşeron yarımadasında ekoloji tarazlığın qorunmasında vacib rol oynayacaq.

 

Ulu öndər Heydər Əliyevin 100 illik yubileyinə həsr edilən aksiya zamanı Müşfiqabad qəsəbəsində Bakı və Abşeron yarımadasının torpaq-iqlim şəraitinə uyğun olaraq 1 hektar əraziyə 650 ağac əkilib, ərazidə olan bitkilərə qulluq göstərilib, müvafiq təmizlik işləri aparılıb.