Bakı Slavyan Universitetində (BSU) “Azərbaycan Qan Donorluğunun İnkişafı Mərkəzi”nin (AQDİM) təşkilatçılığı, həmçinin Talassemiya Mərkəzi və Mərkəzi Qan Bankının birgə dəstəyi ilə “Sağlam olaq – Donor olaq” adlı təbliğat-təşviqat xarakterli tədbir təşkil olunub.

AQDİM-dən Aztibb.az-a verilən məlumata görə,tədbirdə Bakı Slavyan Universitetinin tərbiyə işləri üzrə prorektoru Xanım Sultanova, rektorun müşaviri Elçin Hüseynov, “Azərbaycan Qan Donorluğunun İnkişafı Mərkəzi”nin idarə heyətinin sədri Fuad Rəsul, sədr müavini, Dünya Narkotiklə Mübarizə Aparan İdmançılar Federasiyasının Azərbaycan nümayəndəliyinin rəhbəri Cavid Allahverdiyev, AQDIM-in idarə heyəti sədrinin müşaviri Kamil Hüseynov, eləcə də Mərkəzi Qan Bankının həkimi Günel Əliyeva və Talassemiya Mərkəzinin həkim-hematoloqu Tünzalə Əhmədova mövzu ətrafında məruzələrlə çıxış ediblər.

Qeyd olunub ki, qan vermək hər bir sağlam insanın bəşəri borcudur. Qan vermək insanda qan hüceyrələrinin təzələnməsinə, qandakı yağın miqdarının azalmasına, baş ağrıları, stress, yüksək qan-damar təzyiqi, yorğunluq kimi narahatlıqların azalmasına yaxşı təsir edər. Qan verən insanda ürək xəstəliklərinin baş vermə riski 90 faiz aşağı düşür. Hər dəfə qan verildikdə qan analizi edilir.
Qəza nəticəsində yaralanan birinin, müxtəlif xəstəliklərdən əziyyət çəkən bir körpənin, qan vurulmazsa öləcək bir xəstənin sizin verdiyiniz qanla həyata qayıtması ilə sizə verdiyi mənəvi rahatlıq ölçüsüzdür.