Ümumdünya Səhiyyə Təşkilatının (ÜST) Avropa Regional Ofisi Danimarkanın Kopenhagen şəhərində Səhiyyə işçi qüvvəsinin dayanıqlı planlaşdırılması və analitik sistemlər üzrə regional seminar keçirib.

 

Bu barədə Aztibb.az-a ÜST-nin Azərbaycan Nümayəndəliyindən məlumat verilib.

 

Bildirilib ki, seminarda Azərbaycan və digər Şərq Tərəfdaşlığı ölkə nümayəndə heyətləri iştirak ediblər. Tədbirin məqsədi səhiyyə işçi qüvvəsinin planlaşdırılması sahəsində yanaşmaları gücləndirmək, qərarların qəbulunda əmək bazarı və kadr potensialı barədə məlumatlardan istifadəni təkmilləşdirmək, daha dayanıqlı və çevik səhiyyə sistemlərinin qurulması üçün praktiki fəaliyyət istiqamətləri hazırlamaq olub.

İştirakçılar səhiyyə işçi qüvvəsinin dayanıqlı planlaşdırılması və təhlili istiqamətində əsas istiqamətlər olan məlumat bazası, xidmət modelləri, planlaşdırma üzrə mütəxəssislərin potensialı, idarəetmə, eləcə də siyasi dəstək və kontekstual amilləri müzakirə ediblər.

 

Üç gün davam edən seminar çərçivəsində ölkə nümayəndə heyətləri təcrübə mübadiləsi aparıb, Böyük Britaniya, İspaniya, Niderland, Sloveniya, İsveçrə, Portuqaliya, Yeni Zelandiya, Yunanıstan, Avstriya və Fransadan olan texniki ekspertlərlə birlikdə ümumi və hər bir ölkəyə xas çətinlikləri müzakirə ediblər.

 

Müzakirələrin əsas məqsədi maraqlı tərəflərin müəyyən etdiyi prioritetləri konkret fəaliyyət planlarına çevirmək olub. Ölkə təqdimatları və interaktiv “World Café” formatında keçirilən müzakirələr mövcud imkanların, əsas boşluqların və təkmilləşdirmə istiqamətlərinin müəyyənləşdirilməsinə töhfə verib.

 

Seminarın əsas nəticələrindən biri hər bir ölkə üçün fəaliyyət planlarının və yol xəritələrinin hazırlanması olub, eləcə də əldə olunan irəliləyişin davamlılığını təmin etmək üçün zəruri institusional mexanizmlər və dəstək ehtiyacları əks olunub.

 

Seminar regional müzakirələr, milli siyasət dialoqlarının təşkili, ölkələrarası əməkdaşlıq imkanları və 2027-ci ildə fəaliyyət planlarının icrasını dəstəkləyəcək növbəti addımların müəyyənləşdirilməsi ilə yekunlaşıb.