Xətai Tibb Mərkəzində İnfeksiyaların Profilaktikası və Nəzarəti üzrə (İPN) məsul şəxs, həkim-infeksionist Aysel Musayeva tərəfindən Reanimasiya şöbəsində əl gigiyenası və tibbi əlcəklərdən istifadə qaydalarına həsr olunmuş təlim keçirilib.

 

Aztibb.az xəbər verir ki, təlim Xətai Tibb Mərkəzində təcrübə keçən tibb kollecinin tələbələri üçün təşkil olunub.

 

Təlim zamanı əl gigiyenasının tibb müəssisələrində infeksiyaların yayılmasının qarşısının alınmasında rolu, əllərin düzgün yuyulması və antiseptik vasitələrdən istifadə qaydaları, eləcə də tibbi əlcəklərdən istifadəyə dair göstərişlər barədə ətraflı məlumat verilib.

 

Bununla yanaşı, tibbi əlcəklərin əl gigiyenasını əvəz etmədiyi, onların düzgün və məqsədəuyğun istifadəsinin həm tibb işçilərinin, həm də pasiyentlərin təhlükəsizliyinin təmin olunmasında mühüm əhəmiyyət daşıdığı vurğulanıb.

 

Təlim çərçivəsində tələbələrin nəzəri biliklərinin artırılması, infeksiyaya nəzarət tədbirləri ilə bağlı praktiki bacarıqlarının formalaşdırılması və gələcək peşə fəaliyyətlərində infeksion təhlükəsizlik qaydalarına düzgün əməl etmələrinin təşviqi hədəflənib.