Azərbaycan Tibb Universitetinin (ATU) İctimai səhiyyə fakültəsində Tibb bacısı (qardaşı) işi ixtisası üzrə təhsil alan tələbələr üçün “Tibb bacılığı: gələcəyi formalaşdıran güc” mövzusunda təlim təşkil olunub. 

ATU-dan Aztibb.az-a verilən məlumata görə, təlimdə Liv Bona Dea Hospitalının baş tibb bacısı Miyase Gül Pıçakçı, əməliyyatxanalar üzrə böyük tibb bacısı Elnarə Əfəndiyeva və infeksiyaya nəzarət üzrə böyük tibb bacısı Ramilə Əhmədova iştirak ediblər. 

Tədbirdə İctimai səhiyyə fakültəsinin dekanı, dosent Qalina Qəniyeva təlimin məqsədi barədə məlumat verib. O bildirib ki, təşəbbüs tələbələrin tibb bacılığı peşəsinin əhəmiyyəti barədə biliklərini genişləndirmək, onların peşəkar fəaliyyətə hazırlığını dəstəkləmək və gələcək işlərində məsuliyyətli yanaşmanın vacibliyini vurğulamaq məqsədi daşıyır. 

Daha sonra Miyase Gül Pıçakçı təqdimatla çıxış edib. Təlim zamanı tibb bacılarının səhiyyə sistemindəki rolu, pasiyentlərə keyfiyyətli və təhlükəsiz tibbi xidmətin göstərilməsi, infeksiyaya nəzarət tədbirləri və əməliyyatxanalarda işin təşkili məsələləri müzakirə olunub. 

İştirakçılar tibb bacılığı sahəsində peşəkar fəaliyyətin xüsusiyyətləri barədə məlumat əldə edib, klinik praktikada tətbiq olunan yanaşmalarla tanış olublar. 

Təlim tələbələrin ixtisas üzrə biliklərinin artırılması və tibb bacılığı sahəsində praktiki təcrübənin əhəmiyyətinin diqqətə çatdırılması məqsədinə xidmət edib.