Əmək və Əhalinin Sosial Müdafiəsi Nazirliyinin tabeliyində Dövlət Tibbi-Sosial Ekspertiza və Reabilitasiya Agentliyi 3 Dekabr – Beynəlxalq Əlilliyi olan Şəxslər günü ilə əlaqədar əlilliyi olan fəal gənclər və blogerlərin Sumqayıt Reabilitasiya Mərkəzinə infoturunu təşkil edib.

Agentlikdən Aztibb.az-a bildirilib ki, tədbir Agentliyin fəaliyyəti, əlilliyi olan şəxslərə göstərilən reabilitasiya xidmətləri barədə məlumat vermək, həmçinin onların rəy və təkliflərini öyrənmək məqsədi daşıyıb.

İnfotur iştirakçıları ilə görüşdə bildirilib ki, son illərdə ölkəmizin reabilitasiya infrastrukturu müasir tələblərə uyğun qurulub. 2018-2022-ci illərdə 12 reabilitasiya və sosial xidmət müəssisəsi əsaslı təmir və yenidənqurmadan sonra istifadəyə verilib,  həmçinin ötən il Qəbələ Uşaq Reabilitasiya Mərkəzi açılıb. Yaxın vaxtlarda Şəmkirdə Uşaq Reabilitasiya Mərkəzi də istifadəyə veriləcək. 

Görülən işlər reabilitasiya mərkəzlərinin potensialının və reabilitasiya xidmətləri göstərilən şəxslərin illik sayının 4 dəfə artmasına imkan verib. Agentliyin tabeliyində 15 reabilitasiya müəssisəsi fəaliyyət göstərir.  Həmin müəssisələrdə əlilliyi olan şəxslər səmərəli fizioterapevtik müalicə prosedurlarına, həmçinin müalicəvi bədən tərbiyəsi, sosial-psixoloji xidmətlərə cəlb ediliblər. 

Əlilliyi olan şəxslərin reabilitasiya vasitələri, o cümlədən müharibə ilə əlaqədar əlilliyi olan şəxslərin yüksək texnologiyalı son nəsil protezlərlə təminatı sahəsində aparılan işlər də diqqətə çatdırılıb.

Görüşdə əlilliyi olan şəxslər üçün müyəssər mühitin inkişaf etdirilməsi, inkluzivlik imkanlarının genişləndirilməsi ilə bağlı fikir mübadiləsi aparılıb, rəy və təkliflər dinlənilib. Belə görüşlərin mütəmadi keçirilməsi nəzərdə tutulub.