Zeynəb Hüseynova 7 mart 1974-cü ildə Naxçıvan şəhərində anadan olub. 1997-ci ildə Azərbaycan Tibb Universitetinin Müalicə-profilaktika fakültəsini qırmızı diplomla bitirib. 1997-1998-ci illərdə M.Nağıyev adına Bakı şəhər Təcili Tibbi Yardım Xəstəxanasında internatura keçib. 2006-2008-ci illərdə İ.M.Seçenov adına Moskva Tibb Akademiyasında Mamalıq və ginekologiya ixtisası üzrə klinik ordinaturanı bitirib.

 

O, 2008-2011-ci illərdə İ.M.Seçenov adına birinci Moskva Dövlət Tibb Universitetində Mamalıq-ginekologiya ixtisası üzrə aspiranturanı bitirib. 2011-ci ildə İ.M. Seçenov adına birinci Moskva Dövlət Tibb Universitetində “Hiperandrogeniyalı hamilələrdə döl itkisi sindromunun profilaktika xüsusiyyətləri” mövzusunda namizədlik dissertasiyasını müdafiə edərək tibb üzrə fəlsəfə doktoru elmi dərəcəsini alıb.

 

Zeynəb Hüseynova 1998-1999-cu illərdə Naxçıvan şəhər Xəstəxanasında çalışıb. 1999-2021-ci illərdə 5 saylı Kliniki Doğum Evində, 2021-2022-ci illərdə Kliniki Tibbi Mərkəzdə fəaliyyət göstərib.

Peşəkar həkim 4 oktyabr 2022-ci il tarixində Binəqədi Tibb Mərkəzində direktor müavini, Doğum evinin rəhbəri təyin olunub.

 

Bir çox beynəlxalq konfransların, seminarların iştirakçısı olan Zeynəb Hüseynova Azərbaycan, rus və ingilis dillərində 40-dan artıq elmi məqalənin müəllifidir.

 

O, 2003-cü ildə ABŞ-ın Vaşinqton şəhərində yerləşən "Georgetown University Hospital"ın Mamalıq-ginekologiya şöbəsində könüllü tibb işçisi olaraq çalışıb. Hazırda Azərbaycan Tibb Universitetinin I Mamalıq və ginekologiya kafedrasında doktorantura təhsili alır, tibb üzrə elmlər doktoru elmi dərəcəsi almaq üçün doktorluq dissertasiyası üzərində işləyir.

 

Zeynəb Hüseynova, həmçinin 20 sentyabr 2022-ci ildən Azərbaycan Tibb Universitetinin Tədris Cərrahiyə Klinikasının I Mama-ginekologiya kafedrasında fəaliyyət göstərir.