“Su-elektolit balansı" mövzusunda seminar keçirilib
27.10.2022 15:53
Azərbaycan Tibb Universitetinin (ATU) Tədris Terapevtik Klinikasının müalicə işləri üzrə direktor müavini Fəridə Hacıyeva, dosent Əliyar Sultanov, klinikanın həkimləri və rezidentlərinin iştirakı ilə “Su-elektolit balansı" mövzusunda seminar keçirilib.
 
Tədris Terapevtik Klinikasından Aztibb.az-a verilən xəbərə görə, tədbirdə klinikanın Kardiologiya şöbəsinin rezidenti Əli Balakişiyev mövzu üzrə təqdimatla çıxış edib.
 
O, natrium və kalium təyininin tibbdə böyük əhəmiyyəti olduğunu, hər iki elementin bir çox patologiya zamanı diaqnoz qoyulmasında və müalicənin effektivliyində mühüm rolu olduğunu bildirib. 
 
Əli Balakişiyevin sözlərinə görə, kaliumun miqdarı qan qazına təsir göstərir. Kaliumun artması və ya azalması metabolik asidoz, alkaloza gətirə bilər.
 
"Bu səbəblərə görə bir çox xəstə qruplarında rutin olaraq bu analizlərin yoxlanılması məsləhətlidir. Həmçinin patofiziologiyanın bilinməsi müalicə zamanı bizə kömək edir. Məsələn, diabetik ketoasidoz zamanı etioloji müalicə apararıq, natrium, kalium, HCO3 və pH miqdarını normaya gətirə bilərik. Və ya metabolik alkaloza zamanı NaCl 0.9% istifadə edərik, xəstənin simptomlarını azalda bilərik", - deyə məruzəçi qeyd edib.
 
Geniş müzakirə şəraitində keçən seminarda rezidentlər qarşılaşdıqları situasiyalarla bağlı öz rəylərini və fikirlərini bölüşüblər. Sonda onları maraqlandıran suallara aydınlıq gətirilib.