Türkiyənin Azərbaycandakı təhsil müşaviri Ali Rza Altunel Azərbaycan Tibb Universitetinin (ATU) rektoru, professor Gəray Gəraybəyli ilə görüşüb.
ATU-dan Aztibb.az-a verilən məlumata görə, görüşdə universitetdə təhsil prosesi haqda fikir mübadiləsi aparılıb.
Qonaq ATU-da tələbələr üçün yaradılmış şəraitlə, o cümlədən yataqxanalarla maraqlanıb. Eləcə də Türkiyədən olan tələbələrimizlə görüşmək istəyini dilə gətirib.
A.R.Altunelə ATU-da tələbələrin yüksək səviyyədə təhsil almaları üçün yaradılmış şərait, universitetin maddi-texniki bazası, həmçinin tədris klinikaları və yataqxanalar barədə ətraflı məlumat verilib.
Professor Gəray Gəraybəyli tədris proqramlarının beynəlxalq akkreditasiyadan keçdiyini qonağın diqqətinə çatdırıb. O, A.R.Altuneli ATU-da keçiriləcək Zəfər Günü konsertinə dəvət edib.
Görüşdə ATU-nun Ümumi işlər üzrə prorektoru Nizami Adilov, Beynəlxalq əlaqələr şöbəsinin müdiri Müşfiq Orucov, Xarici tələbələrlə iş üzrə dekan Qorxmaz Əhmədov, Türkiyənin Azərbaycandakı təhsil müşavirinin köməkçisi Faiq Bayramov, ATU-dakı Türkiyəli Tələbələr Şurasının sədri Mehmet Tanış və türkiyəli tələblər də iştirak ediblər.