“Xüsusi geyimdə işləmək asan deyil. Tərləyirik, bədənimiz maye itirir. Hətta, bəzən, xəstələr də çəkdiyimiz əziyyətləri görüb, “gedin, bir az istirahət edin” deyirlər. Amma istirahətə vaxtımız olmur. Xəstələri daim nəzarətdə saxlayırıq ki, saturasiyaları aşağı düşməsin".

Aztibb.az xəbər verir ki, bu fikirləri 1 saylı modul tipli xəstəxanada çalışan 26 saylı şəhər poliklinikasının həkim-terapevti Sevinc Şabanova müsahibəsində bildirib. COVID-19 infeksiyasına yoluxan xəstələrin müalicəsi ilə məşğul olan həkim-terapevt iş prosesindən danışıb.

"Ağır xəstələrimiz çox olub. Psixoloji gərgin vəziyyətdə olan bu xəstələr, “sağalmayacağam" deyirdilər. Amma mən və həmkarlarımın səyi nəticəsində onları sağalda bilmişik. Belə xəstələrin sağalandan sonra etdikləri təşəkkür əvəzolunmazdır"

O, bildirib ki, virusla mübarizədə iştirakı insanlarla münasibətlərinə də təsirsiz ötüşməyib: "Gərgin iş rejiminə görə, uşaqlarımdan ayrı düşmüşəm. Ara-sıra evə gedəndə nəfəsim onlara dəyməsin deyə, üzlərindən yox, ayaqlarını qucaqlayıb öpə bilirəm. Qızım soruşur ki, ana, pandemiya nə vaxt bitəcək və sən nə vaxt əvvəlki kimi məni üzümdən öpə biləcəksən?”