Fizioterapevt: “Osteoxondrozun inkişafını müəyyən müalicə və profilaktik vasitələrin köməyi ilə ləngitmək mümkündür"
06.09.2022 12:49

Damar xəstəliklərindən fərqli olaraq osteoxondroz cavan insanlarda inkişaf edir. İnsanların əksəriyyətində osteoxondroz var. Bunun səbəbini həkimlər müasir insanın azhərəkətli həyat tərzində, düzgün olmayan qidalanmada görürlər. Lakin elə bir dövrdə yaşayırıq ki, oturaq həyat tərzinə öyrəşir, sağlam qidalanmaq üçün isə lazım olan ekoloji təmiz məhsulları seçə bilmirik. Qeyd edək ki, xarici ölkələrdə bu xəstəlik Spondilyoz və Spinal Osteoartrit xəstəlikləri kimi adlanır. Osteoxondrozun qarşısını almaq üçün nə etməliyik? Ümumiyyətlə, bu xəstəlik haqqında nələri bilməliyik?

 

Aztibb.az xəbər verir ki, bütün bu sualları Mərkəzi Gömrük Hospitalının fizioterapvti Səidə Kərimova cavablandırıb

 

-Səidə xanım, osteoxondroz xəstəliyi nədir?

 

Osteoxondroz – insanlar arasında çox yayılmış fəqərə sütunu xəstəliyidir. Osteoxondroz zamanı onurğa sütunu fəqərələri arasında olan qığırdaq zədələnir. Bu qığırdaq amortizasiya funksiyasını yerinə yetirir - qığırdaq fəqərələrə bir birini sıxmağa imkan vermir. Qığırdaq zədələndikdə fəqərələr bir birini sıxmağa başlayır, onların arasında keçən qan damarları və sinirlər sıxılır. Bu isə müxtəlif pozulmalara səbəb olur.

 

- Bəs osteoxondroz hansı əlamətlərlə özünü biruzə verir?

 

Osteoxondrozun növündən asılı olaraq əlamətələr də dəyişir. Belə ki, boyun osteoxondrozu baş ağrıları, başgicəllənməsi, boyun nahiyəsində və qollarda ağrılar, qolların keyiməsi, qulaqlarda küy, beyin qan dövranı pozulması, diqqət və yaddaşın zəifləməsi kimi əlamətlərlə özünü biruzə verir. Onurğa sütunu döş hissəsi osteoxondrozu zamanı ürək, mədə və bağırsaqlarda ağrılar ola bilər.

 

Bel fəqərələri osteoxondrozu zamanı bel nahiyəsində və ayaqlarda ağrılar, baldırlarda qıcolmalar və s. ola bilər. Onurğa sütunu yırtıqları inkişaf etdikcə onurğa beyini sıxılmağa başlayır. Bu səbəbdən xəstənin ayaqlarının tutulması, xəstənin yeriyə bilməməsi və s. kimi problemlər yarana bilər.

 

- Osteoxondrozun inkişafına hansı amillər təsir edir?

 

Osteoxondrozun inkişafına irsiyyət, azhərəkətli həyat tərzi, artıq çəki, ağır yüklərin qaldırılması, travma və mikrotravmalar kimi amillər təkan verir. Osteoxondroz uzun illər ərzində inkişaf edir.

 

-Bu xəstəliyi tam müalicə etmək necə, mümkündürmü?

 

Hazırda bu pozulmanı tam müalicə etmək mümkün deyil. Lakin müəyyən müalicə və profilaktik vasitələrin köməyi ilə bu pozulmanın inkişafını ləngitmək və xəstəni osteoxondrozla bağlı olan ağrılar və digər pozulmalardan xilas etmək mümkündür. Müalicə olunmadıqda osteoxondroz çox ağır fəsadlara, əlilliyə də gətirib çıxarda bilər.

 

Osteoxondrozun kəskin dövrlərində, xüsusilə döş və bel osteoxondrozu zamanı xəstəyə yataq rejimi təyin edilir. Xəstə düz bərk yerdə uzanmalıdır. Müalicə zamanı müxtəlif korsetlərdən, o cümlədən boyun korseti, bel korseti və s. istifadə olunur. Ağrıların və iltihabın azaldılması üçün hər bir pasiyentə uyğun xüsusi preparatlar təyin olunur. Həmçinin, boyun osteoxondrozu zamanı xəstəyə beyin qan dövranını yaxşılaşdıran preparatlar təyin olunur. Çox ağır, müalicəsiz buraxılmış hallarda və həmçinin, onurğa beyini sıxılması zamanı cərrahi müdaxilə tətbiq edilir.

 

Qeyd etmək istəyirəm ki, osteoxondrozun müalicəsi ilə yalnız bu işdə geniş bilikləri və təcrübəsi olan mütəxəssis məşğul olmalıdır. Düzgün aparılmayan müalicə xəstənin vəziyyətinin daha da ağırlaşmasına səbəb ola bilər.

 

Xəstəliyin remissiyası (sakitləşmə) dövrlərində xüsusi massaj və müalicəvi fiziki tərbiyə, manual terapiya, fizioterapiya (elektroforez), onurğa sütunu uzatması, xüsusi müalicəvi vannalar, bəzi dərman preparatları tətbiq edilir.

 

-Hansı idman növü osteoxondrozun mülicəsinə müsbət təsir edir?

 

Maraqlı sualdır, təşəkkür edirəm. Üzgüçülük osteoxondrozla mübarizədə ən effektli və sınanmış metodlardan biridir. Su onurğa sütununda olan gərginliyi azaldır, "masaj" edir, onurğa sütununu saxlayan əzələləri bərkidir.

 

-Səidə xanım, Mərkəzi Gömrük Hospitalının fizioterapiya şöbəsində osteoxondroz xəstələrinə hansı kompleks müalicəni tətbiq edirsiniz? Pasiyentlərə nə tövsiyə edərdiniz?

 

Mərkəzi Gömrük Hospitalının Fizioterapiya şöbəsi ən son avadanlıqlarla təchiz olunmuşdur. Aparılan müalicələr klinik protokollara uyğun kompleks şəkildə, müasir fizioterapiyanın ən yeni metodları vasitəsi ilə həyata keçirilir. Hospitalda ultrasəs, kombinə elektroterapiyası, endopress, elektrostimulyasiya, qısa dalğa, lazer, traksiya, hot packcold pack, maqnitoterapiya, balneoterapiya, tibbi masaj, manual terapiya, detoksikasiya, biopunktura, biorezonans, zərbə dalğa terapiyası kimi müalicə üsulları tətbiq olunur.

 

Pasiyentlərimizə isə tövsiyəm budur ki, bir qədər fəal həyat tərzinə keçsinlər: daha çox açıq havada gəzsinlər, heç olmasa, gündə 1-2 dəfə ən sadə idman hərəkətləri etsinlər, bədənlərində hər hansı ağrı, narahatlıq hiss edən kimi həkimə müraciət etsinlər. Bununla ağır xəstəliklərin vaxtında qarşısını almaq mümkündür.

 

-Maraqlı müsahibə üçün təşəkkür edirik.

ÇOX OXUNANLAR
Qaraciyərin düzgün işləməməsinin ƏLAMƏTLƏRİ  
Təbii vasitə 12 həftə ərzində 8 kiloqrama qədər arıqladır
Buğda cücərtisi gənclik iksiri kimi də bilinir
Təcili tibbi yardım briqadasının yardımı ilə 66 yaşlı xəstə Mərkəzi Klinik Xəstəxanaya hospitalizasiya olunub
Şuşa Rayon Mərkəzi Xəstəxanasının ginekoloqu Şəbnəm Baxşəliyeva - Həkimlərimizi tanıyaq!
Şahdamara stend taxıla bilərmi?
Uzman həkim Şiraslan Baxşəliyev Gəncə Beynəlxalq Xəstəxanasında pasiyentləri qəbul edəcək
Masallı Rayon Mərkəzi Xəstəxanasının otorinolarinqoloqu Kamran Musayev - Həkimlərimizi tanıyaq!
Qaradağ Tibb Mərkəzində daha bir uğurlu əməliyyat icra olunub
Böyrək daşı xəstəliyi nədir və necə yaranır?
Uşaq cərrahı Günel Əmiraslanova Şəkidə Bonum Medicalda pasiyent qəbulu həyata keçirəcək
Sürətli döyüntünün tək səbəbi ürək deyil!
Regionlarda fəaliyyət göstərən peşəkar səhiyyə işçilərini tanıtmaqda davam edirik!
Ağır vəziyyətdə Respublika Uşaq Klinik Xəstəxanasına yerləşdirilən 2 yaşlı uşaq həyata qaytarılıb