Tibb Universitetində dil öyrənməyin üsulları haqqında mühazirə dinlənilib - Fotolar
10.06.2022 10:10

“Tələbələr səhv edərək danışmağa can atmalıdır. Müəllimlər də tələbələri yönlədirməyi, həvəsləndirməyi bacarmalıdır”. Bu haqda neyrolinqvistika təhsilli azərbaycanlı poliqlot, TedX layihəsinin iştirakçısı Aslan Məmmədzadə Azərbaycan Tibb Universitetinin tələbələri ilə görüşündə bildirib. ATU-nun Tələbə Həmkarlar İttifaqı Komitəsinin təşkilatçılığı ilə keçirilən görüşdə A.Məmmədzadə tələbələrə dil öyrənməyin üsulları haqqında danışıb.   

 

Aztibb.az xəbər verir ki, peşəkar səviyyədə 9 dil bilən, 9 dildə sərbəst danışan Aslan Məmmədzadə  "Dil öyrənməyin üç qızıl qaydası" adlı  təlimində qeyd edib ki, istənilən dildə onu öyrənməyə başladığın ilk gündən danışmağa cəhd etməlisən. “Kiçik addımlarla, səhvlər edərək danışmağa başlamalıyıq. Səhv etmək normaldır. Həftədə bir neçə dəfə kurslara getməklə dil öyrənmək mümkün deyil. Bunun üçün paralel olaraq oxumaq və dinəmə bacarığını da inkişaf etdirməlisən”. Söhbətini zarafatlarla, əyləncəli formada aparan A.Məmmədzadə çıxışının sonunda tələbələrin suallarını cavablandırıb. 

 

Qeyd edək ki, Aslan Məmmədzadə orta məktəbi Lənkəranda bitirdikdən sonra Türkiyənin Süleyman Dəmirəl Universitetində təhsil alıb. Azərbaycan, türk, rus, ingilis, polyak, ispan, fransız, italyan, alman dillərini tədris edən Aslan Məmmədzadə hazırda təsisçisi olduğu “Practical languages” şirkətində pedaqoq kimi fəaliyyət göstərir.