“Bəzən gənc tibb işçilərimizdə həyəcan, gərginlik hiss olunur. Mən və mənim kimi uzun illərdir bu sahədə çalışan həmkarlarım onlara dəstək oluruq, bütün çətin işlərində onlara kömək edirik”.

Aztibb.az xəbər verir ki, bu fikirləri Mərkəzi Neftçilər Xəstəxanasının reanimasiya şöbəsində tibb bacısı Zahirə Həsənova müsahibəsində bildirib. 43 ildir tibb sahəsində çalışan Z.Həsənova indiyədək çox çətin vəziyyətlərlə rastlaşdığını, lakin koronovirusla mübarizənin digər xəstəliklərdən fərqləndiyini qeyd edib.

“Bilirsiniz ki, reanimasiyaya ağır xəstələr yerləşdirilir. Onlara kömək etmək üçün əlimizdən gələni edirik. Əzmkarlığımız hesabına xəstələrimizi sağ-salamat yola sala bilirik. Bu peşəni seçərkən çətinliklərindən də əvvəldən xəbərdar idik. Hər birimiz bunu dərk edirik və koronovirusla mübarizə nə qədər çətin olsa da, işimizi yarıda qoymaq fikrində deyilik”.

Onun sözlərinə görə, çətinlik təkcə iş prosesində müşahidə olunmur. Gündəlik həyatda da bir çox dəyişikliklər baş verib.

“Ən əsası, bir müddətdir ailəmizdən məhrum olmuşuq. Nəvələrimdən ötrü çox darıxıram. Mobil proqramlar vasitəsilə onları görə, onlarla danışa bilirəm. Ailə üzvlərimin həyatını təhlükəyə atmamaq üçün evə getmirəm, bizim üçün ayrılan oteldə qalıram. Arabir oğlum gəlir, mənə geyim gətirir. Məsafəni gözləməklə bir neçə dəqiqə söhbət edə bilirik. Tezliklə xəstəliyə qalib gələcəyimizə inanıram”, – deyə Z.Həsənova vurğulayıb.