Azərbaycan Tibb Universitetində (ATU) ənənəvi xeyriyyə aksiyasına start verilib.

Aztibb.az xəbər verir ki, ATU-da məşhur oftalmoloq, akademik Zərifə Əliyevanın ad gününə həsr olunmuş humanitar aksiyası çərçivəsində universitetdə təhsil alan 12 tələbə ödənişsiz göz əməliyyatı olunub.

Aksiya ATU-nun rektoru, professor Gəray Gəraybəyli və oftalmoloq həkim Qurban İsmayılovun təşəbbüsü ilə keçirilir.

ATU-nun Tədris Cərrahiyyə Klinikasının oftalmologiya şöbəsinin müdiri Qurban İsmayılov qeyd edib ki, bu gün artıq 17 tələbə Excimer lazer göz əməliyyatı olunub: “Onlar aztəminatlı ailənin övladlarıdır. Bu tələbələrin laborator müayinələrindən tutmuş bütün əməliyyat xərclərinə kimi lazım olan hər bir şey universitet rəhbərliyinin təşəbbüsü ilə ödənilib. Əməliyyat zamanı gənclərin gözündə yüksək dərəcəli miyoplar aradan qaldırılıb və əməliyyat tam fəsadsız başa çatıb”.

Xeyriyyə aksiyası 3 gün davam edəcək və bu müddətdə ümumilikdə 25 tələbənin əməliyyat olunacağı planlaşdırılır.

Qeyd edək ki, Əməliyyat xərcləri universitet rəhbərliyi və oftalmologiya şöbəsinin müdiri Qurban İsmayılov tərəfindən ödənilir. ATU rəhbərliyinin təşəbbüsü ilə hər il mayın 10-da – milli lider Heydər Əliyevin anadan olmasının ildönümlərində də tələbələr üçün belə aksiyalar təşkil olunur.