Vətəndaşların tibbi xidmətə əlçatanlığının artırılması məqsədilə Xızı rayonunun Fındığan kəndində səyyar müayinələr təşkil olunub.

 

Aztibb.az TƏBİB-ə istinadla xəbər verir ki, Xızı Rayon Mərkəzi Xəstəxanasının və ailə sağlamlıq mərkəzlərinin pediatr, nevroloq, ginekoloq, terapevt, cərrah və digər ixtisaslı həkimlərinin iştirak etdiyi müayinələrdə 50-dən çox vətəndaşa 230 tibbi xidmət göstərilib. İcbari tibbi sığortanın Xidmətlər Zərfi çərçivəsində həyata keçirilən müayinələr zamanı sağlamlıqlarında problem aşkarlanan şəxslər ixtisaslı tibbi xidmətlərin göstərilməsi məqsədilə aidiyyəti tibb müəssisələrinə yönləndirilib.

 

Xatırladaq ki, Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə Xızı Rayon Mərkəzi Xəstəxanasına səyyar tibbi xidmətlərlə bağlı yeni alınmış 2 ədəd xüsusi təchizatlı təcili tibbi yardım avtomobili ayrılıb və komplektləşdirilib. Avtomobillər zəruri cihaz və avadanlıqlarla, eləcə də dərman preparatları ilə dəstləşdirilib.

 

Pasiyentin vəziyyətinə nəzarət və reanimasiya tədbirləri üçün avtomobillər kardiomonitor, defibrilyator, elektrokardioqraf (EKQ), mobil süni tənəffüs cihazı, perfuziya və infuziya cihazları ilə təchiz olunub. Diaqnostik müayinə və ilkin qiymətləndirmə üçün stetoskop, otoskop, oftalmoskop, spirometr ilə təmin olunub. Əlavə olaraq, görüntüləmə və dərin müayinə üçün mobil ultrasəs müayinəsi (USM), mobil exokardioqraf (EXO) və rəqəmsal DR sistemli mobil rentgen aparatı da mövcuddur.