Azərbaycan Qan Donorluğunun İnkişafı Mərkəzinin (AQDİM) təşkilatçılığı, Azərbaycan Milli Olimpiya Komitəsinin, komitənin "Ədalətli" oyunlar komissiyasının, TƏBİB-in, Milli Hematologiya və Transfuziologiya Mərkəzinin Mərkəzi Qan Bankı bölməsinin və Talassemiya bölməsinin rəsmi tərəfdaşlığı, eləcədə Beynəlxalq Muğam Mərkəzinin dəstəyilə konsert proqramı təşkil olunub.

Aztibb.az-a AQDİM-dən verilən xəbərə görə, "Mənim Qəhrəmanım" adlı konsert proqramı donorlar, irsi qan xəstəliyindən əziyyət çəkən, əlilliyi olan şəxslər, həmçinin şəhid ailələrinin üzvləri, qazilər və müharibə iştirakçıları üçün təşkil edilib.

Tədbir şəhidlərimizin əziz xatirəsi yad edildikdən sonra Dövlət Himninin səsləndirilməsi ilə başlayıb.

Daha sonra Azərbaycan Qan Donorluğunun İnkişafı Mərkəzinin idarə heyətinin sədri Fuad Rəsul çıxış edərək tədbirin rəsmi hissəsinin açılışını edib.

Beynəlxalq Muğam Mərkəzinin direktoru, Əməkdar artist Sahib Paşazadə, Milli Olimpiya Komitəsinin vitse-prezidenti, komitənin "Ədalətli" oyunlar komissiyasının sədri Xəzər İsayev, Milli Məclisin deputatı Jalə Əhmədova, Azərbaycan Dövlət Mədəniyyət və İncəsənət Universitetinin dosenti, Əməkdar incəsənət xadimi Fəxriyyə Xələfova çıxış edərək tədbirin əhəmiyyəti və mahiyyəti barədə danışıblar.

Rəsmi hissə bitdikdən sonra bədii hissədə Azərbaycan Respublikanın Xalq artistləri – Teyyub Aslanov, Gülyaz Məmmədova, Əməkdar artistlər – Gülüstan Əliyeva, Ədalət Şükürov, xanəndə Mirələm Mirələmov, gənc müğənni Anar Nəbiyev, eləcə də əlilliyi olan gənc müğənnilər – Aysel Əlizadə, Rəvanə Ağamirova və Arzu Mirzəyeva geniş konsert proqramı ilə çıxışlar ediblər.