Yanvarın 3-də Azərbaycan Tibb Universitetində 2021-2022-ci tədris ilinin payız semestrinin qış imtahan sessiyası başlayıb.
Aztibb.az ATU-ya istinadla xəbər verir ki, II Müalicə-profilaktika fakültəsinin 1-ci və 2-ci kurslar üzrə dekan müavini Sevinc Məhərrəmova 2-ci kurs tələbələrinin imtahan verdiklərini bildirib:
“Tələbələr seçim fənnindən imtahan verirlər. Seçim fənni iki blokdan – “Dinamik anatomiya” və “Təkamül genetikası”ndan ibarətdir. Onlar hansı fəndən imtahan verəcəklərini özləri müəyyənləşdiriblər. Bu gün 2-ci kursda təhsil alan 428 tələbə imtahanda iştirak edəcək. İmtahan verənlər arasında ingilis dili bölməsində təhsil alanlar da var. Hazırda sakit və şəffaf şəraitdə imtahan gedir. Yaradılmış şəraitdən tələbələrimiz razılıq edir. İndiyədək heç bir qayda pozuntusu qeydə alınmayıb”.
İmtahan Mərkəzinin müdiri, filologiya üzrə fəlsəfə doktoru Ülkər Cəfərova qeyd edib ki, imtahan əziyyətli və ağır prosesdir:
“Testlərin hazırlanmasından başlamış, sistemdə yerləşdirilməsi və tələbəyə təqdim olunanmasınadək bir mərhələ keçirik. Heç bir texniki problemimiz yoxdur. Gördüyünüz kimi, normal şəkildə imtahanlar gedir. Amma bəzən bizdən asılı olmayan səbəbdən problemlərlə də üzləşirik”. Bu haqda danışan Ü.Cəfərova bildirib ki, bəzi kafedralarda testlərin hazırlanmasına məsuliyyətlə yanaşmırlar:
“Bu səbəbdən bəzən yanlış suallara rast gəlinir. Hazırda Dinamik anatomiya və Təkamül genetikası fənlərindən imtahan götürürük. Amma hərəsindən bir sual yanlış düşüb. Bununla bağlı apellyasiya şikayəti verilib. Ailə təbabəti kafedrasının testlərində də qüsurlar var idi. Yaxşı olar ki, istər adını çəkdiyim, istərsə də digər kafedralar testləri hazırlayanda dəfələrlə yoxlasınlar. Mövcud vəziyyət diqtə edir ki, testlər təkmilləşdirilsin, təkrar suallar aradan qaldırılsın”.
Ü.Cəfərova xatırladıb ki, təhsil nazirinin müvafiq əmrinə əsasən fevralın 1-dək imtahanlar başa çatdırılacaq:
“Üzrlü səbəbdən iştirak etməyənlər üçün fevralın 3-4-ü, 7-8-i imtahanlar keçirilməsi nəzərdə tutulub. Paralel olaraq xaricdə yaşayan tələbələrimiz üçün onlayn imtahanlar təşkil etmişik. Onlar da imtahanlara qatılır və yüksək göstəricilər nümayiş etdirirlər”.
