Son günlər uşaqlar arasında geniş yayılmış xəstəlik bir çox valideynləri evdə müalicə aparmağa vadar edir. Uşaqlar arasında ən çox yayılmış əlamətlərdən biri də güclü öskürəkdir. Bir çox hallarda valideynlər uşaqlardakı öskürəyin qarşısını almaq üçün ev şəraitində inqalyasiya aparatlarından istifadə etməli olurlar. Bəs ev şəraitində inqalyatorların istifadəsi nə dərəcədə təhlükəsizdir?

Kliniki Tibbi Mərkəzin tabeliyində olan Ə.F.Qarayev adına 2 saylı Uşaq Klinik Xəstəxanasının Yoluxucu şöbəsinin müdiri Aynur Musayeva Aztibb.az-ın bununla bağlı suallarını cavablandırıb.

Öskürək əleyhinə inqalyasiya aparatlarının həkim göstərişi olmadan istifadəsi nə dərəcədə doğrudur?

İnqalyatorlardan, eləcə də digər tibbi prosedurlar üçün nəzərdə tutulan alətlərdən həkim təyinatı və nəzarəti olmadan istifadə etmək qətiyyən düzgün deyil. İnqalyatorların müxtəlif növləri var. Bu növlər hər bir xəstəlik və xəstə üçün fərdi göstəricilər əsasında müəyyənləşdirilir. Yalnış cihaz seçimi xəstənin vəziyyətini daha da ağırlaşdıra bilər.

Hansı dərmanlardan göstərişsiz istifadə fəsadlara səbəb ola bilər?

İnqalyatorda istifadə ediləcək dərmanı yalnız həkimlər fərdi olaraq, göstəriş əsasında təyin etməlidir. Özbaşına istifadə edilən hər bir dərman vasitəsinin əlavə və yan təsirləri ola bilər. Bəzən bu əlavə və yan təsirlər hətta həyat üçün təhlükə yarada bilər.

İnqalyasiya dərmanları necə təyin olunur?

Hər bir xəstəyə fərdi yanaşılır və xəstəliyin gedişatına uyğun, həmçinin xəstənin yaşı, çəkisi, dərmanlara həssaslığı, ailə anamnezi nəzərə alınaraq dərman vasitəsi təyin edilir.

Hansı məhlulları həkim təyinatı olmadan istifadə etmək olar?

Ev şəraitində həkim təyinatı olmadan inqalyasiya etmək tövsiyə olunmur. Əgər inqalyasiya etmək zərurəti yaranarsa, bu zaman ev şəraitində yalnız çay sodası, qazsız mineral sular, evkalipt və mixək yağı, eləcə də digər bitkilərdən istifadə etmək mümkündür.

Ümumiyyətlə, inqalyasiya mövzusunda valideynlər nələrə diqqət etməlidir?

İlk növbədə, həkim göstərişi olmadan inqalyatorlardan istifadə edilməməlidir. İstifadə zamanı inqalyator başlığının fərdi olmasına diqqət yetirmək vacibdir. Nəzərə alınmalıdır ki, hər bir uşaq fərdidir və hər bir xəstəliyin gedişatı fərdi ola bilər. Bir halda istifadə edilən dərman vasitəsi digər halda effekt göstərməyə bilər. Həmçinin xəstənin fərdi xüsusiyyətləri, yaşı, çəkisi, dərman vasitələrinə qarşı olan effektivliyi nəzərə alınmalıdır. Bütün bu sadaladığımız faktorlar inqalyatorların istifadəsi zamanı inqalyasiya prosesinin keyfiyyətinə və xəstəyə nə dərəcədə yardımçı olacağına zəmin yaradır.