“Regional İnkişaf” İctimai Birliyi (RİİB), Azərbaycan Könüllü Həkimlər Assosiyasiyası və TƏBİB-in birgə təşkilatçılığı ilə Cəlilabad Rayon Mərkəzi Xəstəxanasında tibbi aksiya təşkil olunub.

Aksiya çərçivəsində Bakı şəhərində müxtəlif dövlət və özəl xəstəxanalarda çalışan onkoloq, kardioloq, radioloq, terapevt, pediatr, nevroloq, uroloq və digər ixtisaslar üzrə 45 nəfərdən ibarət könüllü həkim heyəti tərəfindən Cəlilabadda 300-dən çox şəhid və qazi ailələrinin üzvləri müayinə olunub. Onlara müvafiq müalicə kursları təyin edilib, zəruri dərman vasitələri ilə təmin olunub, eləcə də digər patologiya aşkar edilən xəstələr ixtisaslaşmış tibb müəssisələrinə yönləndirilib. Aparılan müayinələr zamanı xəstəlik aşkarlanmış vətəndaşların sonradan ixtisaslaşmış tibb müəssisələrində tam müayinələrdən keçirilməsi, müalicəsi və zərurət yarandıqda, cərrahiyə əməliyyatları həyata keçiriləcək.

Silsilə tədbirlər şəklində baş tutan tibbi aksiyada ATU-nun II Müalicə-profilaktika fakültəsinin dekan müavini Arzu Bəydəmirovanın təşəbbüsü və rəhbərliyi ilə ilk dəfə bu universitetin tələbələri də iştirak ediblər.

Aksiyaya fakültənin 5-ci kurs tələbələri Azayev Zahid, Süleymanov Musa, Ünal Muhammed Yarıcı, 6-cı kurs tələbələri Əhmədova Nərmin, Əsədova Kəmalə, Heydərov Rüfət, Xasıyeva Ülkər, Qarakişiyeva Rəqsanə, Şahbazzadə Fəridə, Yusifova Aysel olmaqla 10 tələbə qatılıb. Tələbələr müxtəlif ixtisaslar üzrə bölünərək EKQ, tiroid və abdominal USM-si, oftalmoskopiya, görmə itiliyinin müayinəsi, palpasiya, auskultasiya, qan təzyiqinin ölçülməsi, qlükometriya kimi müayinələri sərbəst şəkildə həyata keçirib, öz bilik və bacarıqlarını nümayiş etdirməklə, həkimlərə dəstək olublar.