Həkim reportajı: Yumurtalığın burulması və səbəbləri

Həkim reportajı: Yumurtalığın burulması və səbəbləri

29.11.2021 14:48

Yumurtalığın burulması qadının qarnının aşağısnda olan ağrıların nadir, lakin təhlükəli səbəblərindən biridir.

Patologiyanın özəlliyi venoz axının pozulması nəticəsində yumurtalıqda yaranan ödem və qansızmadır. Burulma yumurtalıqların hiperstimulyasiya sindromunun fəsadlarından biridir.

Burulma bir tərəfli olur. Adətən böyümüş yumurtalıq zədələnir. Normal orqanın burulması isə əsasən uşaqlarda rast gəlinir. Damarların sıxılması nəticəsində yumurtalıqda venoz axın və arterial qan təchizatı pozulur. Toxumalarda oksigen aclığı baş verir. Nəticədə yumurtalıq toxuması infarkt olur, yəni, ölür.

Patologiya müxtəlif yaş qruplarında inkişaf edir, amma ən çox 25-30 yaşlı qadınlarda rast gəlinir. İnkişaf etmiş ölkələrdə bu prosesin rast gəlməsi bir qədər yüksəkdir. Bu, onlarda süni mayalanmanın və uyğun olaraq, ovulyasiyanın hormonal stimulyasiyasının geniş yayılması ilə izah olunur.

Yumurtalığın burulmasına uşaqlıq borularının inkişaf qüsurları, onların uzun və qıvrılmış olması, bədxassəli şişlər, uşaqlıq borularında aparılan cərrahi əməliyyatlar səbəb olur.

Qarnın aşağı hissəsində ağrı əmələ gəldikdə, mütləq rəngli doppleroqrafiya ilə ultrasəs müayinəsi aparılmalıdır. Bu müayinə orqanının qan təchizatını görməyə imkan verir. Yumurtalıq şişləri, kiçik çanaqda cərrahi əməliyyatlar və hamiləlik kimi risk faktorları diqqəti xüsusi cəlb etməlidir.

Yumurtalıqların burulmasında cərrahi əməliyyat – yeganə effektiv müalicə üsuludur. Orqanın normal vəziyyətini və qan təchizatını mümkün qədər tez bərpa etmək lazımdır. Ən yaxşı nəticə əlamətlərin əmələ gəldiyi vaxtdan cərrahi əməliyyata qədər 8 saatdan az vaxt keçdikdə alınır.

Adətən laparoskopiya tətbiq edilir, amma o olmadıqda, adi açıq üsul da istifadə edilə bilər. Əməliyyat ümumi narkoz altında aparılır. Əgər laparoskopiya zamanı fəsadlar aşkarlanarsa, əməliyyatı açıq üsulla, yəni, qarın divarında kəsik aparmaqla davam etdirmək lazım gələ bilər.