ABŞ-ın dərman istehsalçısı “Pfizer” COVID-19-a qarşı hazırlanmış eksperimental antiviral dərman "Paxlovid" üçün təcili istifadə icazəsi almaq məqsədilə ABŞ Qida və Dərman İdarəsinə (FDA) müraciət etdiyini açıqladı.

Dərmanın "Ritonavir" adlı virus əleyhinə dərmanla birlikdə istifadə ediləcəyini bildirən istehsalçı klinik sınaqda “Paxlovidin”in böyüklərdə xəstəxanaya yerləşdirmə və virusa bağlı ölümlərin qarşısının alınmasında 89 % müvəffəqiyyətli olduğu bildirilib.

Aztibb.az xəbər verir ki, açıqlamada dərmanın istehsalı və paylanmasına təxminən 1 milyard dollar sərmayə qoyulduğu, İngiltərə, Avstraliya, Yeni Zelandiya və Cənubi Koreya da daxil olmaqla bir sıra ölkədə icazə prosesinin başlandığı və beynəlxalq müraciətlərin daha çox planlaşdırıldığı qeyd olunur.

"Dünya səviyyəsində 5 milyondan çox insan ölümü ilə nəticələnən bu dəhşətli xəstəlikdən həyat qurtaran müalicə variantlarına təcili ehtiyac var… Biz bu potensial müalicənin xəstələr üçün əlçatan olmasından ötrü mümkün qədər tez hərəkət edirik və müraciətimizi nəzərdən keçirmək üçün FDA və dünyanın digər qurumları ilə işləməyi səbirsizliklə gözləyirik”, – deyə “Pfizer” rəsmisi açıqlamasında bildirib.

ABŞ-ın digər bir əczaçılıq şirkəti “Merck” də ötən ay COVID-19-a qarşı hazırladığı dərman üçün təcili istifadənin təsdiqi məqsədilə FDA-ya müraciət edib.