Süd vəzi əməliyyatı olunmağınız həqiqətən lazımdırmı? Bunları bilməliyik!
13.10.2021 15:18
Süd vəzi əməliyyatları dünyada ən çox həyata keçirilən əməliyyatlardır. Əslində isə bunların çoxuna ya ehtiyyac yoxdur, yaxud da gərəksiz yerə həyata keçirilməkdədir.
 
Süd vəzisinin xərçəng xəstəliyindən başqa əməliyyatı vacib sayılan ciddi bir xəstəliyi yoxdur.
 
Həkim ilk öncə müayinə üçün müraciət edən hər bir xəstədə süd vəzi xərçəngi olub-olmadığını araşdırmalıdır. Süd vəzi xərçəngi yoxdursa, əməliyyata da ehtiyyac yoxdur.
 
Süd vəzisi xərçənginin ilkin diaqnozu süd vəzisi ultrasəsi və mamoqrafiyası ilə qoyulur. Lakin ilkin və erkən diaqnoz əməliyyat etmək üçün kifayət deyildir. Əməliyyat etmək üçün diaqnozu dəqiqləşdirmək və təsdiqləmək lazımdır. Bunun isə ən sadə yolu "iynə biopsiyası"dır.
 
İynə biopsiyası xəstəxana şəraitində yerli keyitmə ilə həyata keçirilən ağrısız və təhlükəsiz bir üsuldur. Doğruluğu 100 %-ə yaxındır və biopsiyadan sonra 2 gün ərzində dəqiq diaqnoz cavabı əldə edilir. Əgər biopsiya cavabında süd vəzi xərçəngi təsdiqlənməyibsə, qorxmağa və əməliyyata ehtiyyac yoxdur.
 
Süd vəzi xərçəngi xərçəng olaraq yaranır və xərçəng kimi davam edir. Süd vəzisinin heç bir xoşxassəli xəstəliyi sonradan xərçəngə çevrilmir. Süd vəzisində olan kistalar, fibroadenoma və mastopatiya adlanan süd vəzisi ağrısı heç bir zaman xərçəngə çevrilməz.
 
mamoloq Həmdi Köçər
 
Aztibb.az