Son zamanlar uşaqlıq boynu xərçənginə qarşı peyvənd aktuallaşır.
Virusun bəzi tipləri cinsi yolla ötürülür. Bu səbəbdən, yoluxma cinsi həyatın başlanğıcında baş verir. Virus uzun illər ərzində orqanizmdə gizli qala bilir və əlverişli şərait yarandıqda hətta yoluxmadan 20 il sonra belə xəstəlik törətməyə qadirdir. Bəlli olmuşdur ki, anogenital nahiyənin kondiloması 90% halda, uşaqlıq boynu xərçəngi isə 80% halda viruslar tərəfindən törədilir.
Vaksinlərin hazırlanması və tibbi praktikaya uğurlu daxil edilməsindən sonra hazırda 60-dan çox ölkədə vaksinoprofilaktika aparılır.
Uşaqlıq boynu xərçənginin profilaktikası məqsədilə bütün dünyada iki vaksin istifadə olunur. Hər iki preparatın Azərbaycanda istifadəsinə icazə verilir. Yaşdan asılı olmayaraq, tam vaksinasiya üçün preparatlar 3 dəfə yeridilir.
İmmunizasiyanın maksimal effekti virusa yoluxana qədər aparıldıqda alınır. Yoluxduqdan sonra təbii ki vaksinasiya heç bir profilaktik effekt vermir. Nəzərə alsaq ki, yoluxma cinsi yolla baş verir, aydındır ki, peyvəndləmə işini cinsi həyata başlayana qədər, yəni, 14-16 yaşlı qız uşaqlarına aparmaq lazımdır. Bu, ÜST-ün tövsiyələrinə uyğundur.
Eyni zamanda, HPV-yə qarşı vaksinasiyanı müayinə vaxtı virus tapılmış 26 yaşına qədər qadınlarda və cinsi əlaqədə olmamış 30 yaşından yuxarı qadınlarda aparıla bilər. Baxmayaraq ki, bəzi klinisistlər vaksinasiyadan sonra xəstəliyin daha yüngül keçməsini qeyd edirlər, bu məlumatlar azdır və araşdırılma aparılmasını tələb edir.
mama-ginekoloq Ramilə Abbaszadə
Aztibb.az