Orta əsrlərdə Avropada hil dərman hesab olunub və apteklərdə satılırdı. Dünyada geniş yayılan hili çox vaxt “kralların ədviyyatı” adlandırırlar.

Aztibb.az xəbər verir ki, hil xüsusilə həzm sistemi üçün xeyirlidir. Məhz buna görə bəzi Şərq ölkələrində hil toxumları yeməkdən sonra çeynənilir, yaxud çaya əlavə olunaraq içilir.

Hil ağızdan gələn pis qoxunu yox edir, ürəkbulanmanı aradan qaldırır, iştahanı artırır, mübadilə prosesini yaxşılaşdırır, köpə qarşı faydalıdır. Artıq çəkidən azad olmaq üçün də hil çox faydalı vasitələrdən biridir.

Təbii antiseptikdir, soyuqdəymə zamanı onu çay və suya atıb xəstəyə vermək müsbət təsir göstərir. Boğaz ağrıları zamanı hil dəmləmələri ilə qarqara çox yaxşı təsirə malikdir. Həmçinin, diş ağrılarını azaldır, ürəyin fəaliyyətini yaxşılaşdırır.

Hilin aromatik yağlarını suya əlavə edib vanna qəbul olunması həm stress və gərginliyi aradan qaldırır, həm də əsəbləri sakitləşdirir.

Axşamlar 1 stəkan nanə çayına 5-6 ədəd hil qarışdırıb dəmləmək və yatmazdan 1 saat əvvəl içmək yuxunu rahatlaşdırır. İnfeksion xəstəliklər zamanı da hil çayı içmək orqanizmə müsbət təsir göstərir.