Yaşından asılı olmayaraq hər bir qadında aparılmalıdır

Kolposkopiya uşaqlıq boynuna, uşaqlıq yoluna xüsusi işıqlandırma və optik böyütmə sistemi olan aparatla baxılmasına deyilir. Bunun üçün 10,15,20 dəfə böyütməyə malik, rəngli işıq filtrləri olan videokolposkopdan istifadə olunur.

Kolposkopik müayinə uşaqlıq boynunun, uşaqlıq yolunun, xarici cinsiyyət üzvlərinin (vulva) patoloji proseslərinə diaqnoz qoymaq, aparılan müalicənin dinamikasını izləmək və məqsədyönlü biopsiya etməyəyə imkan verir.

Bu müayinənin ginekoloqa müraciət edən, yaşından asılı olmayaraq hər bir qadında aparılması vacibdir. Yaşı 35-dən yuxarı olan qadınlardan isə göstəriş üzrə patohisto və patositoloji material götürülür. Çünkü bu müayinə metodu xərçəngönü vəziyyət və xərçəngin preinvaziv mərhələsini təyin etmək üçün aparılır.

Kolposkopiyanın vəzifələri uşaqlıq yolu, uşaqlıq boynu, vulvanın epitelisinin vəziyyətini qiymətləndirmək, zədələnmə ocağını aşkar etmək,  müəyyən prosesləri bədxassəli şişlərdən differensə etmək və məqsədyönlü biopsiya aparmaqdır.

cərrah, mama-ginekoloq Ülviyyə Qüdrətova

Aztibb.az